Тәуелсіздіктің арқасы: алматылық дәрігер арманының ақиқатқа айналғанын қуанышпен жеткізді

Алматылық жастар «Тәуелсіздіктің мен үшін маңызы» атты республикалық челленджін жалғастырып жатыр, деп хабарлайды Almaty.tv.

 Заман талабына сай ғылым мен білімді игеріп, бүгінде қоғамға үлес қосып жүргендердің бірі – Айгүл Медеулова. Жоғары санатты дәрігер Тәуелсіздік жылдарында сапалы білім алып, арманының ақиқатқа айналғанын қуанышпен жеткізеді. Сондай-ақ, өзге салалардың қарқынды дамуына ел тәуелсіздігі серпіліс бергенін сөз етті.

«Тәуелсіздіктің арқасында көптеген жас маманның мүмкіндігі артты деп айтуға болады. Өйткені шекара ашылды. Білімін бір-бірімен алмастырып, мүмкіншілік артты деп айтуға болады», – деді Д. Асфендияров атындағы ҚАЗҰМУ клиника директорының орынбасары Айгүл Медеулова.

Ал, шет тілдерін жетік меңгеріп, бүгінде ұстаздық еткен Тәуелсіздіктің түйдей құрдасы Ердос Молдахметовтың айтуынша, егемендігіміздің тарту еткен тамаша мүмкіндігі – ол білім алудағы еркіндік. Ғылым жолын қуған өскелең ұрпақ үшін барлық жағдай қарастырылғанын, қалаған оқу орнын таңдауға болатынын мысал етті.

«Мақсатымның бірі – шетелдік инвесторлармен жұмыс істеу. Қазір, құдайға шүкір, инвесторлар Қазақстанға көптеп келуде. Ол да Тәуелсіздігіміздің арқасында болып жатқан нәрсе», – деді ағылшын тілінің оқытушысы Ердос Молдахметов.