Таразда 21 жастағы жігіт оқушы қызды зорламақ болған

Таразда тал түсте оқушы қызға азғындық жасамақ болған азамат қолға түсті. Аюандық әрекетке барғысы келген жиырма бір жастағы жігітті жергілікті таксист пен оқушы қыздың ұстазы бірігіп ұстап берген. Ақыры қашып құтылмасын білген жас жігіт арам ойының болғанын мойындады.

Әлеуметтік желіде №8 мектепте оқитын 3-ші сынып оқушысын зорламақ болды деген күдіктінің суреті жарияланған. Ертесіне оның көшеде жүргенін сол оқушының мұғалімі көріп қалады. Жігітті жалғыз өзі қолға түсіруге әлі келмейтінін білген соң, ұстаз көшедегі таксистен көмек сұрайды. Бекболат Досанов сөзге келмей бірден көлігіне отырып, күдіктінің ізіне түседі. Қашамын деп әбден шаршаған жігіт ақыры ұсталған.

«Ол соңынан ары-бері қуалаған соң, әбден шаршап қалған. Қолынан ұстадым да, қолын бұрап машинаның терезесіне қыстырып, сөйтіп артқа жүріп көшеге алып шықтық», - деді Бекболат ДОСАНОВ. 

Ал күдіктінің өзі қолға түскен кезде оқушы қызға азғындық көрсетіп, арам ойын жүзеге асырғанын айтады. Бірақ мектеп директоры болса, шәкіртім жәбір көрген жоқ, оған медициналық тексерулер дәлел, дейді. Білім ордасы басшылығының айтуынша, 3-ші сынып оқушысын жақындары мектепке жеткізбей жарты жолда қалдырып кеткен.  Дәл сол кезде 21 жастағы күдікті жеткіншекті тұншықтырып, подьезге сүйреген. Куәгерлер көріп айғай салған соң, арам пиғылы іске аспай қашып кеткен. Қазір күдікті ұсталған кездегі  бейнежазба әлеуметтік желіге тарап, қызу талқыға түсіп жатыр. Көбісі ұсталған азаматтың ақыл-есінде ауытқушылық болуы мүмкін деген пікірді алға тартуда.

«Енді екі қыз көріп қалмаған кезде бәрі де мүмкін еді. Бірақ бақытымызға, қуанышымызға орай, ондайдың алдын алдық деп айтуға болады», - деді  Тараз қалалық №8 гимназия директорының міндетін атқарушы Әлішер ӘЗІМБАЙ.

Расымен де қамауға алынған жігіттің жүйке жүйесі ауруханасында 10 жылдан бері тіркеуде тұрғаны анықталыпты. Қазір ол қамауға алынып, тергеу амалдары жүргізілуде. Ал зәбір көрген қызбен психолгтар жұмыс істеп жатыр. Осы оқиғадан кейін Тараздағы мектептерде тәртіп күшейтілген. 

Тоғжан Аман, «Алматы» арнасы Тараздан