Алматыда биыл студенттерге арналған екі жатақхана салынады

Алматы әкімі Б. Сағынтаев студенттік жатақханаларды салу жөнінде айтты, деп хабарлайды Almaty.tv.

Қала әкімі жұмыс сапары кезінде Д. Қонаев атындағы Еуразиялық заң академиясының көпсалалы кешенінде болды. 

Мегаполис әкімі Instagram-дағы өзінің парақшасында қаладағы жоғары оқу орындарының студент жастардың өмір сүру жағдайларын жақсарту бойынша жатақханалар салып жатқанын айтты. Бұла –  Елбасының «Бес әлеуметтік бастамасындағы» негізгі міндеттің бірі.

«Д. Қонаев атындағы Еуразиялық заң академиясында ашылғалы жатқан көпсалалы кешенде болдым. 100 студентке арналған орын, оқытушыларға арналған бөлмелер, сондай-ақ тұрмысқа қажет асхана, кір жуатын орын, кітапхана, медпункт, интернет-сыныптар қарастырылған», – деп жазды Б. Сағынтаев.

Соңғы екі жылда жоғары оқу орындары 1,5 мың орынға жуық 5 жатақхана салды және модернизацияланды. Осы жылы 1,7 мың студентке арналған тағы екі ғимараттың құрылысы басталды.

«Алматы – жастар қаласы. Сондықтан білім алып жүрген жастардың өмір сүру мен тұрмыс жағдайын жақсарту бойынша жұмыстарды жалғастыра береміз», –  деп атап өтті Алматы әкімі.