Медеу ауданы кәсіпкерлері «Барлығы тазалықты бақылайды» челленджін бастады

Алматыда кәсіпкерлер «Алматы – біздің ортақ үйіміз» қалалық бастамасы және «Таза Қазақстан» республикалық бағдарламасы аясында өтіп жатқан «Жарқын күз» күзгі акциясын қолдады, деп хабарлайды Almaty.tv.

Медеу ауданының кәсіпкерлері «Барлығы тазалықты бақылайды» челленджін бастады. Олар осылайша абаттандыру төлқұжаттарын жаңа ережелерге сәйкес рәсімдеген бизнес субъектілерін біріктіргісі келеді.

Медеу ауданының бизнес-субъектісінің өкілі Дәулет Жолдасбек бастамаға өзінің қатысуы туралы айтты:
"Жақында біз жаңа талаптарға сәйкес абаттандыру паспортын рәсімдедік. Біз учаскелер мен жауапкершілік аймақтарын, соның ішінде біздің кәсіпорынға іргелес аумақты нақты анықтадық, ол үшін біз қазір жауап береміз. Бізге экологиялық акцияларды қолдау маңызды, өйткені бұл қаланың тазалығына қосқан үлесі ғана емес, сонымен қатар бизнестің жауапкершілігінің көрсеткіші. Біз эстафетаны Алмалы ауданының кәсіпкерлеріне береміз және мұндай бастамалар бүкіл қалада қолдау табады деп үміттенеміз", – деді ол.

Оның айтуынша, челлендж қалада экологиялық мәдениетті қалыптастыруда маңызды рөл атқарады. Ол кәсіпкерлердің іргелес аумақтардың жай-күйі үшін жауапкершілігін арттыруға және абаттандыру мәселелеріне жұртшылықтың назарын аударуға бағытталған. 

"Жаңа ережеге сай, паспорт қабылдадық. Соның аясында қонақүйдің ауласында асфальт төсеу жұмыстарын, бордюрлерін ауыстыру, қонақүйдің сыртын әрлеу жұмыстары қолға алынып отыр. Медеу ауданынан эстафетаны Алмалы ауданына жолдаймыз", – деді қонақүй қызметкері Керімхан Жаңбырбаев.

Алматының коммуналдық инфрақұрылымды дамыту басқармасының ақпараты бойынша 5 590 кәсіпкерлік объектісі паспорттауға жатады. Бүгінгі таңда мыңнан астам кәсіпкер абаттандыру паспортына қол қойды. Паспорттау жұмыстары келесі жылдың сәуір айында аяқталады деп күтілуде.

Оқи отырыңыз: Алматыдағы «Жарқын күз» науқаны аясында урналарды жинау үшін арнайы экипаждар бөлінді