Соғыстан қалған техника: Қалдаяқов көшесінің бойында мұражай ашылады

Ұлы Жеңістің 80 жылдығына орай Алматыдағы Қалдаяқов көшесінің бойында әскери техника мұражайы ашылады, деп хабарлайды Almaty.tv.

Көрмеге соғыс жылдары қолданылған қару-жарақтың 30-ға жуық түрі қойылмақ. Қатарында 1931 жылғы артиллериялық мылтық сынды құнды экспонаттар да бар. Ерекшелігі сол, Армия үйінің аумағында орналастырылатын мұражай 28 гвардияшы – панфиловшылар саябағындағы мемориалды кешеннің құрамына кіргізілмек.

«Жұмысты Қорғаныс министрі генерал-полковник Руслан Жақсылықовтың бастамасымен қолға алынды. 1940 жылдары соғысқа қатысқан техникалар осы жерге орналастырылып жатыр. Қазіргі кезекте біз толықтай аумақты көгалдандыру жұмыстарын жүріп жатыр. Қала қонақтары тынығып, отыратын болады», – деді ҚР Қорғаныс министрлігінің ресми өкілі Руслан Жангулин.

Армия үйінде де қайта қалпына келтіру жұмыстары қарқынды жүргізіліп жатыр. Ғимараттың концерт залы, жауынгерлік даңқ мұражайы күрделі жөндеуден өткен. Ал мұндағы киностудия 35 жылдан кейін жұмысын қайта бастағалы отыр. Жаңашылдық әскери-патриоттық фильмдердің санын арттыруға бағытталыпты.

«Жеңістің 80 жылдығының қарсаңында өте көп нысан қайта қалпына келтіріліп, жаңғыртылып жатыр. Алматы үшін Армия үйінің маңызы зор. Мұндағы әрбір жәдігер сол бір кезеңдерден сыр шертеді, өткенді бейнелейді», – деді ҚР Қарулы күштерінің Ұлттық әскери-патриоттық орталығының бастығы Арман Асенов.

Оқи отырыңыз: Ғабит Мүсіреповтің "Қайрошы": тарихта үш есіммен есте қалған соғыс ардагері кім