Сұрақ-жауап: Әуезов ауданы тұрғындарының мәселесі қалай шешіледі

Биыл Әуезов ауданындағы 13 көшедегі 10 шақырым жолға орташа жөндеу жүргізіледі. Сондай-ақ 35 километрге жуық арық желісі салынады. Бұл туралы Алматы әкімі Ерболат Досаев айтты, деп хабарлайды Almaty.tv тілшісі.

Аудан тұрғындарымен кездесуінде шаһар басшысы қоғамдық көлік қызметінің сапасын арттыруға айрықша мән беріліп жатқанын да жеткізді. Былтыр Әуезовтегі жылжымалы құрам 238 автобуспен толыққан

Өзгеріс байқалатын ауданның бірі – Әуезов. Биыл мұндағы 81 көшені жарықпен қамтамасыз ету көзделіп отыр. Сондай-ақ тәртіпті қадағалау мақсатында 1000-нан аса бейнебақылау камерасын орнату жоспарланған. Ал Алматы қаласы үшін маңызды жобаның бірі – Наталия Сац атындағы балалар мен жасөсіпірімдерге арналған мемлекеттік академиялық театрды жаңғырту жұмысы 2026 жылдың маусым айында ақталмақ. Аудандағы өзекті мәселелердің бірі – автобус аялдамалары.

«Рысқұлов, Сүйінбай, Саин көшелерінің бойындағы аялдамаларды көріп жүрміз. Темірден жасалған, кейбірі боялмаған, арасында кірлеп тұрғандары да кездеседі. Осы олқылықтардың орнын толтыра аламыз ба? Біз ою-өрнектелген аялдамаларды көргіміз келеді», – деді қала тұрғыны.

 «Екі жыл ішінде қаладағы барлық аялдама кешенін кезең-кезеңімен ауыстырамыз. Автобустардың бағытын көрсетіп тұратын ақпараттық тақтайшалармен жабдықтаймыз. Жолаушылары көп орындарда үлкен аялдамалар қойылады. Қазір тиісті бағдарлама әзірленіп, қаражат қарастырылып жатыр. Күзде жұмыс басталады», – деді Алматы қаласының әкімі Ерболат Досаев.

Кездесуде автотұрақ пен көлік жолына, көгалдандыруға қатысты мәселелер де талданды. Ал жылу және ыстық су құнының өсуі көпті толғандырған сауалдың қатарына енді.

«Жылу және ыстық судың тарифі жоғарылады. Осыған қатысты не айтасыз?» – деді қала тұрғыны.

«Өздеріңіз білесіздер, барлығы электр энергиясымен байланысты. Жауапты мамандар түгелдей қадағалап отыр. Ал қолдауға мұқтаж тұрғындарға арналған арнайы бағдарлама қалада екі жылдан бері жұмыс істеп тұр. Әлеуметтік тұрғыдан осал топтағы азаматтар аудандық басқармаларға жүгініп, қажетті көмек ала алады. Оған бюджеттен қаражат та қарастырылды. Атап өтейін,  есептегіш құрылғылары бар тұрғындар, қондырғы орнатпағандарға қарағанда азырақ төлейді», – деді қала әкімі.

Кездесуде мектептердегі орын тапшылығын азайту үшін жаңа білім ордалары мен қосымша ғимараттар салынып жатқаны айтылды. Биыл Әуезов ауданында №13 және №158 мектептер үшін жаңа ғимарат, №42 мектепке қосымша 300 орынға шақталған нысан салу көзделіпті. Қазір жобаның құжаттамалары дайындалып жатыр.

Сондай-ақ биыл Әуезовте 280 орындық екі балабақшаның құрылысы аяқталмақ. Шаһар басшысы басқосуда «Халық қатысатын бюджет» бағдарламасының аясында осы жылы 30 жобаға қаржы бөлінгенін де сөз етті. 2025 жылы аудандағы көппәтерлі 45 тұрғын үйге күрделі жөндеу жүргізілмек. 

Рүстем Айткәрім, Ялкунжан Әшімжанов

Оқи отырыңыз: Алматыда әлеуметтік саладағы көмекші персоналдың жалақысы артты