ОСК президент сайлауын өткізуге 12 млрд теңге сұрады

Қазақстан Республикасы Қаржы министрінің орынбасары Берік Шолпанқұлов Парламент Сенатының кулуарында кезектен тыс президент сайлауын өткізуге 12 млрд теңге қажет болуы мүмкін екенін айтты.

«Бүгінде резерв қалдығы – 51 млрд теңге. Бүгінде сайлау үшін ОСК 12 млрд теңге бөлу жөнінде өтінішхат енгізді. Есептеулерді бағалау, негізділігін тексеру жүргізіліп жатыр. Қорытындысын хабарлаймыз. Сома қысқаратын шығар. Сұралған соманың 70%-ы сайлау окургтерінде жұмыс істеуге тартылған тұлғалардың жалақысына бөлінеді. Олардың саны қанша екенін айта алмаймын. Егер барлық есептеулер ұсынылатын болса, біз екі күннің ішінде талдау жасап, қорытынды береміз», - деп айтты Шолпанқұлов.

Оның айтуынша, былтыр бюджеттен 2020 жылы өтетін президент сайлауына 8,8 млрд теңге бөлінген. 2019 жылы 1 қаңтарда ең төменгі жалақы мөлшері көбейген соң сома көбейіп отыр.

Осыған дейін әрбір президенттікке кандидатқа сайлауалды жұмыстар үшін 7,5 млн теңге бөлінетіні хабарланған болатын. Кандидаттарды ұсыну 28 сәуір күні 18.00-де аяқталады.