Коронавирус: Италия Рождество мерекесінде «қызыл аймаққа» кіреді

Италияның Премьер-Министрі Джузеппе Контенің үкіметі Италияны рождестволық мерекелерге шектеу қойып, COVID-19 инфекциясының үшінші толқынының алдын алуға ниетті, деп хабарлайды Almaty.tv тілшісі ҚазАқпаратқа сілтеме жасап.

Үкімет бүкіл Италияны қызыл аймаққа енгізеді деп күтілуде, яғни барлар, мейрамханалар мен маңызды емес дүкендер жексенбіде, ұлттық мерекелерде және бірнеше күн бұрын жабылуы керек, деп хабарлады Конте өзінің үкіметін қолдайтын партиялармен кездесуде. 

Бұл шектеулер Рождество мерекесінен 6 қаңтардаға дейін болмақ. 

Осы кезеңдегі жұмыс күндері Италия «қызғылт сары аймақта» болады. Бұл кезде дүкендер ашық, ал барлар мен мейрамханалар жабық болады. Сонымен қатар 14 жасқа дейінгі балаларды есептемегенде, ең көп дегенде екі адамға басқа үйлерге баруға рұқсат етіледі. 

Контенің кабинеті 18:00-де өңірлік губернаторлармен келіссөз жүргізіп, жаңа шектеулері бар жарлықты қарау үшін кездесуі керек. 

Өңірлік мәселелер жөніндегі министр Франческо Бочча Sky TV-ге берген сұхбатында: 

«Біз әлсіз және қарт адамдарды қорғауға шешім қабылдауымыз керек. Сол себепті әрқайсысымыз Рождествоны өз үйімізде өткізгеніміз дұрыс», – деді. 

Сондай-ақ үкімет 21 желтоқсаннан 6 қаңтарға дейін өңірлер арасындағы қозғалысты шектейді. Тұрғындар Рождество, Әулие Стефан күні және Жаңа жылда өз қалаларын тастап ешқайда шыға алмайды. Алайда 5000-нан аз халқы бар қалалар үшін басқаша қарастырылған. Мұндай шағын қала тұрғындары 30 км радиуста, провинция астаналарынан бөлек бағыттарға жол жүре алады. 22:00-ден басталатын түнгі коменданттық сағат өз күшінде қалады.