Әлеуметтік мәні бар ауру: науқастар медициналық көмекті қай жерден ала алады

N11 қалалық емхана директорының орынбасары Алмаш Ардабаева әлеуметтік мәні бар сырқатпен ауыратындарды бақылау тіркелген жері бойынша ауруханада немесе мамандандырылған орталықта жүргізілетінін айтты, деп хабарлайды Almaty.tv.

Мысалы, туберкулезге қарсы орталықта туберкулез, ЖИТС-тің алдын алу және оған қарсы күрес орталығында адамның иммун тапшылығы вирусы (АИТВ) тудыратын ауру, онкологиялық орталықта қатерлі ісік, психикалық денсаулық орталығында психикалық, мінез-құлық бұзылыстары (аурулар) қаралады.

Созылмалы вирусты гепатит пен бауыр циррозын бекітілген емханада немесе гастро- және гепатология орталығында бақылайды.

- Қант диабеті, балалар церебральды сал ауруы, жіті миокард инфаркты (алғашқы 6 ай), ревматизм, дәнекер тінінің жүйелі зақымдануы, жүйке жүйесінің дегенеративті аурулары, орталық жүйке жүйесінің демиелинизациялық аурулары, орфандық аурулар, - осы аурулардың барлығына науқас тіркелген емхана бақылау жүргізеді», - дейді Алмаш Ардабаева.

Науқаста әлеуметтік мәні бар ауру анықталған жағдайда амбулаторлық деңгейде арнайы мамандарға мерзімді әрі жоспарлы түрде бару, диагностикалық тексерулер (аспаптық және зертханалық), сондай-ақ учаскелік дәрігер мен медбикенің қабылдауы және дәрі-дәрмекпен қамтамасыз ету емдеу тізіміне енгізіледі.

Егер науқастың созылмалы ауруы асқынса немесе жоспарлы сауықтыру қажет болса, онда мұндай науқас күндізгі немесе тәулік бойғы стационарға жатқызылады.

Оқи отырыңыз: Алматыда Абай күнін атап өту кімнің бастамасы