Хостелдегі өрттен зардап шеккендерге кешенді медициналық көмек көрсетілуде

Алматыдағы хостелде өрт кезінде зардап шеккендерге кешенді медициналық көмек көрсетілуде, деп хабарлайды Аlmaty.tv. 

Шәріпов көшесіндегі хостелде өрт салдарынан зардап шеккен 5 адамға медициналық көмек дәрігерлер қойған диагноздар аясында толық көлемде көрсетілуде, деп хабарлады Алматы қаласы Қоғамдық денсаулық сақтау басқармасының басшысы Иран Шаметеков ӨКҚ брифингінде.

- Зардап шеккен төрт адамның жараларына алғашқы хирургиялық емдеу көрсетілді: эвакуация кезінде бұл азаматтардың денесінің түрлі бөлігі зақымданған. Оларды жедел жәрдем бригадасы тексеріп, ауруханаға жеткізді. Сондай-ақ бүгін тағы бір науқас газдан улану диагнозымен токсикология бөліміне жатқызылды. Жағдайы орташа ауырлықта, есін жиды және оған ем толық көрсетілуде, - деді Иран Шаметеков.

Алғашқы медициналық көмек көрсетілгеннен соң зардап шеккен төрт адам амбулаториялық емделуге үйлеріне жіберілді.

Шәріпов көшесіндегі өрт салдарынан 13 адам қаза тауып, 5 адам зардап шекті. Хостелде барлығы 72 тұрғын болды, олардың 12-і студен. Хостел тұрғындары арасында кәмелетке толмағандар жоқ.

Оқи отырыңыз: Алматы әкімдігі өрттен қаза тапқан қазақстандықтардың отбасына 1 млн теңгеден бөледі