«Мерейлі отбасы» ұлттық конкурсына қатысуға өтінім қабылдау басталды

«Мерейлі отбасы» ұлттық конкурсы туралы» Қазақстан Республикасы Президентінің 2013 жылғы 6 желтоқсандағы № 250 өкіміне сәйкес Қазақстанда жыл сайын «Мерейлі отбасы» ұлттық конкурсы өткізіледі, деп хабарлайды Almaty.tv тілшісі ҚР Ақпарат және қоғамдық даму министрлгіне сілтеме жасап.

Конкурс екі кезеңде өтеді: бірінші – аудандық (қалалық) кезең, екінші – облыстық (республикалық маңызы бар қала, астана) кезең.

Конкурсқа қатысу үшін өтінімді қажетті құжаттармен қоса арнайы нысан бойынша аудандық (қалалық) комиссиялар 2022 жылғы 15 маусымға дейін қабылдайды.

Конкурсты ұйымдастырушылар – Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен Қазақстан Республикасы Ақпарат және қоғамдық даму министрлігі, жергілікті атқарушы органдар.