Ұялы байланыс операторлары абоненттерге үндеу жасады

Қазақстанның ұялы байланыс операторлары біртұтас уақыт белдеуіне көшуге байланысты өз абоненттеріне үндеу жолдады, деп хабарлайды Аlmaty.tv тілшісі Tengrinews.kz-ке сілтеме жасап. 

Қазақстанда 1 наурызға қараған түні сағаттың өзгеруіне байланысты болуы мүмкін техникалық ақаулар туралы SMS-хабарламалар таратылды. 

- Үкіметтің UTC + 5 уақыт белдеуіне көшу туралы қаулысына сәйкес 29 ақпанда 23:00 (UTC +6) мен 1 наурыз 06:00 (UTC +5) аралығында сервистерді ықтимал шектеумен техникалық жұмыстар жүргізіледі. Банктер, мемлекеттік сервистер және басқа да мекемелер сияқты серіктестер жүргізетін қосымша сервистерге уақыт белдеуін өзгерту жөніндегі техникалық жұмыстар әсер етуі мүмкін екеніне назар аударамыз, - деп хабарлады ұялы байланыс операторының баспасөз қызметі.

Компания "жаңа уақыт белдеуіне көшуге байланысты техникалық жұмыстар барасында мүмкін болатын шектеулерді болдырмау үшін" абоненттерге тарифті алдын ала – биылғы 29 ақпанға дейін төлеуді ұсынды.

- Түнгі уақытта кейбір қызметтердің жұмысында қысқа мерзімді үзілістер туындауы мүмкін. Төлем жүйелерін ауыстыру бойынша сәтсіздіктер көп емес. Алайда ондай жағдай орын алса, абоненттер түсіністікпен қарайды деп үміттенеміз. Оператор аталған өзгерістерді абоненттерімізге барынша ыңғайлы болуына күш-жігерін салады, - делінген ұялы байланыс операторының хабарламасында. 

Оқи отырыңыз: Қазақстандықтар сағат тілін қашан өзгертуі керек