38 мыңнан астам тіркелмеген SIM-карта тәркіленді

SIM-BOX пайдаланған алаяқтық әрекетің жолы кесілді, деп хабарлайды Almaty.tv тілшісі Ұлттық ұлан баспасөз қызметіне сілтеме жасап.

Жыл басынан бері Ұлттық ұланның «Бүркіт» арнайы жасағы ІІМ-нің киберқылмысқа қарсы бөлімшелері және «Қазахтелеком» АҚ-мен бірлесіп, 57 SIM-BOX құрылғысын заңсыз пайдаланудың жолын кесті. Арнайы операция барысында түрлі ұялы байланыс операторларына тиесілі 38 мыңнан астам тіркелмеген SIM-карта тәркіленді.

Тек наурыздың алғашқы онкүндігінде «Бүркіт» арнайы жасағы мен полиция қызметкерлері осындай 4 фактіні анықтады.

"Астанада автокөлігінде ел аумағында алаяқтық қоңыраулар шалуға арналған SIM-BOX құрылғысын тасымалдаған шетел азаматы ұсталды. Тінту барысында одан 128 ұяшығы бар екі SIM-BOX, 19 қазақстандық оператордың SIM-картасы және компьютерлік техника тәркіленді. Одан бөлек мобильді байланысқа заңсыз араласу фактісі бойынша елордалық екі тұрғын ұсталды. Олардан екі SIM-BOX және компьютерлік техника табылды. Сол күні Шымкент қаласының тұрғыны да SIM-BOX құрылғыларын заңсыз сақтағаны және пайдаланғаны үшін ұсталды", — делінген хабарламада.

 Тергеу барысында күдіктілердің криптовалюта арқылы апта сайын шамамен 1 мың АҚШ доллары көлемінде заңсыз пайда тауып отырғаны анықталды. Барлық ұсталғандар қамауға алынды, тергеу жалғасып жатыр.

Оқи отырыңыз: Алматыдағы 6 микрокаржылық ұйымның басшылығына қатысты тергеу жүргізіліп жатыр