Ақтөбеде алаяқтық жасады деп күдіктелген бұрынғы шенеунік ақталып шықты

Ақтөбе қаласы әкімі аппаратының басшысы қызметін атқарған Нұрсұлтан Исембайұлы сотта ақталып шықты. Оған Қылмыстық кодекстің «Алаяқтық» бабы бойынша айып тағылды, деп хабарлайды Аlmaty.tv тілшісі ҚазАқпаратқа сілтеме жасап.

№2 Ақтөбе қалалық сотында сотталушы Нұрсұлтан Исембайұлына қатысты іс қаралды. Іс былтыр желтоқсан айында түсіп, күні бүгінге дейін жүрді. Оған Қылмыстық кодекстің «Алаяқтық» бабы, яғни, мемлекеттiк функцияларды орындауға уәкiлеттiк берілген адамның қызмет бабын пайдаланып бөтеннің мүлкін жымқыру, алдау немесе сенімді теріс пайдалану арқылы бөтеннің мүлiкін иемдену бойынша айып тағылды. Айыптау қорытындысына сүйенсек, 2022 жылы С.Сабырова коммерциялық мақсатта жер алмақ болып, танысы Б.Олжагереевке хабарласады.

Ол кезде Б.Олжагереев Ақтөбе қаласының тиімді даму орталығы басшысының орынбасары қызметінде жүріп, әңгімені қала әкімі аппаратының жетекшісі болған Нұрсұлтан Исембайұлына жеткізгенін, оның 3 млн теңге ақша сұрағынын айтады. 2022 жылдың қыркүйек айында Б.Олжагереев С.Сабыровамен дәмханада кездесіп, 3 млн теңге алды, Б.Олжагереев ақшаны Ақтөбе қаласы әкімі аппаратының кабинетінде Нұрсұлтан Исембайұлына береді. Сот отырысында сотталушы кінәсін мойындамады. 

- Сот жарыссөздерінде мемлекеттік айыптаушы Қылмыстық кодекстің 190 бабының 3 бөлігінің 2 тармағында көзделген қылмыстық құқық бұзушылықты жасағаны үшін кінәлі деп танып, өмір бойы мемлекеттік қызметте қызмет атқару құқығынан айыра отырып, 5 жыл мерзімге бас бостандығынан айыру түріндегі жазаны тағайындауды сұрады. Сот үкімімен Нұрсұлтан Исембайұлы кінәсіз деп танылып, қылмыстық құқық бұзушылық жасауға қатысқаны дәлелденбегені үшін ақталды. Ол қылмыстық процесті жүргізетін органның заңсыз әрекеттері кезінде келтірілген зиянды өтеуге құқылы. Басқа тұлғаны жауапқа тарту қажеттілігі туралы мәселені шешу үшін істі прокурорға жіберу туралы шешім қабылданды. Сот үкімі заңды күшіне енген жоқ,- деп хабарлады №2 Ақтөбе қалалық сотының баспасөз қызметі. 

Оқи отырыңыз: Қарағанды облысында сирек кездесетін металдардың ірі кен орны табылды