Алматы зообағындағы ең кәрі керік көз жұмды

Алматы зообағында ширек ғасыр өмір сүрген Хан есімді керік көз жұмды, деп хабарлайды Almaty.tv.

Зообақ қызметкерлерінің хабарлауынша, бойы бес метрге жуық жануар қаладағы зообақта 25 жыл өмір сүрді (адам өмірімен есептегенде бұл 95 жасқа тең). Жалпы жабайы табиғатта керіктер шамамен 20 жыл өмір сүреді және бұл жастан асатындары сирек кездеседі.

Хан Алматы хайуанаттар бағына Оңтүстік Африка Республикасынан әкелінген. Ол жергілікті ауа «райына, осындағы ортаға тез бейімделіп, келушілердің сүйікті жануарына айналды. Ширек ғасыр ішінде Алматы зообағында Ханның 12 ұрпағы дүниеге келді. Қазір Ханнан туған Батыр, Ханзада және Сұлтан атты кішкентай керіктер зообақ қызметкерлерінің қамқорлығында және келушілерді қуантып жүр. Ал Ханның басқа құлындары Мәскеу, Краснодар өлкесі, Шымкент, Ташкент, Ақтөбе, Ферғана хайуанаттар бағына берілген.

"Хан – жағымды әрі жұмсақ мінезімен, ерекше көркімен ең танымал және сүйкімді жануарларымыздың бірі болды, сондай-ақ зообақ қызметкерлерінің және барша келушілердің есінде қалады", - делінген зообақ хабарламасында.

Хан соңғы кездері өзін сергек сезініп жүрді, тәбеті де жақсы болды. Жем-шөбін де толық жеп тауысатын. Бірақ, қарттығына байланысты аздап буындары ауыратын.

"Хан кешкісін өте белсенді болды. Өзіне берілген жем-шөбін тауысып жеді. Аздап ақсап жүретін. Таңға жуық ол жерге жатып қалды. Әдетте, керіктер толық денесімен жерге жатпайды. Керік үшін 25 жас – адамның 95 жасындай болады. Біз оны бәріміз жақсы көрдік, келушілер де оны жақсы көретін. Ұзақ жылдар бойы Ханға қамқорлық көрсетіп, күтім жасаған барлық қызметкерлерге алғыс айтамыз" – деді "Тұяқты жануарлар" секциясының меңгерушісі Балабек Махатов.

Тәуелсіз патологоанатом маман, Қазақ ұлттық аграрлық зерттеу университетінің профессоры Мауланов Амангелді Заманұлы Ханның жалпы жағдайы жақсы болған, оның бойында инфекциялық және бақса да қатерлі дерт болмағанын айтты.

"Керіктің өлімінің себебі – қартайған жасқа байланысты қайтымсыз өзгерістер яғни биологиялық қартаю", - деді ол.

Оқи отырыңыз: Алтын-Емел ұлттық паркінде екі арланын ерткен қар барысы фототұзаққа түсіп қалды