Ана мен бала өлімі: дәрігерлердің салғырттығынан жүкті келіншек көз жұмды

Жамбыл облысы Шу ауданындағы жүкті келіншектің қазасы дәрігерлердің салғырттығынан болған. Аймақта құрылған арнайы комиссия осындай қорытынды шығарды, деп хабарлайды Almaty.tv.

 Бұған дейін 25 жастағы Әдемі Ешеналиева жүктілігінің 33-аптасында аудандық ауруханаға барып, бақилық болды деген ақпарат тараған еді. Комиссия жауаптылардың мерзімінен бұрын барған әйелге тиісті көмек көрсетпегенін анықтады. Яғни жүкті әйелдің ісік дәрежесін бағамдамай, зәр мөлшерінің шамадан тыс төмендегеніне назар аудармаған. Салдарынан науқастың қан қысымы 170-ке көтеріліп, есінен таныпты. Алдымен құрсақтағы баласы шетінеп, кейін өзі де 12 күн жансақтау бөлімінде жатып қайтыс болған. Осы жағдайдан соң салалық басқарма басшысы мен Ана мен бала денсаулығын қорғау бөлімінің басшысына қатаң сөгіс берілді. Ал аудандық аурухананың бас дәрігері мен босандыру бөлімінің басшысын қызметінен босату туралы ұсыныс жасалған. Енді арнайы құрылған комиссия іс құжаттарын құқықтық органдарға табыстамақ.

 «Дәрігерлер оны тексеріп, облыстық перенеталдық орталыққа жіберу керек еді. Ол бірінші дәрежеде қалып қойған. Біздің облыстық комиссияның жұмысы аяқталды.Министрлік осы мәселені қарайды», – деді Денсаулық сақтау басқармасы басшысы орынбасарының м.а. Қаракөз Сағынғалиева.

Оқи отырыңыз: Қарағанды облысында департамент басшысы пара алды деген күдікке ілінді