Елімізде 13 мың шақырым жол жөнделеді

Елімізде 13 мың шақырым жол жөнделеді. Оның 9,5 мыңы толық қаржыландырылып қойған, жөндеу енді басталады. Бұл туралы Үкімет отырысында Көлік министрі Марат Қарабаев мәлімдеді, деп хабарлайды Almaty.tv тілшісі.

Оның айтуынша, қалған 3,6 мың шақырым жолды жөндеу мәселесі халықаралық қаржы институттарымен талқыланып жатыр. Жоспар бойынша, бұл шаруа шетелдік қаржы ұйымдарының қолдауымен қолға алынбақ.

Айта кетейік, былтыр ел аумағында 12 мың шақырым жол жаңартылып, жол инфрақұрылымын жақсарту жұмыстары қарқын ала түсті.

 «Жезқазған – Қарағанды», «Ақтөбе – Ұлғайсын», «Атырау – Доссор» жаңа жобалары, сондай-ақ Сарыағаш, Рудный және Қызылорда қалаларының айналма жолдары және жалпы ұзындығы 3600 шақырымды қамтитын жөндеу жұмыстары халықаралық қаржы институттары қаржыландырады. Әрбір жоба бойынша кординациялық кеңестің шешімімен қаржыландыру көзі анықталды. Техникалық экономикалық негіздемелер әзірленді және халықаралық қаржы институттары шарттарына сәйкес мердігер ұйымдарды анықтау бойынша рәсімдер жүргізілуде, – деді ҚР көлік министрі Марат Қарабаев.

Сонымен қатар, Қазақстанда биыл 19 млн шаршы метр тұрғын үй пайдалануға беріледі. Бұл үшін «Бәйтерек» холдингі арқылы 500 млрд теңге бөлуді жоспарлап отыр. Бұл қаржы жалға берілетін пәтерді сатып алу мен инженерлік инфрақұрылымды дамытуға және «Отбасы» банкінің ипотекалық бағдарламаларына бағытталады. Сондай-ақ  биыл елді газдандыру деңгейін 62,6 пайызға дейін жеткізу жоспарланып отыр. Бұл өткен жылмен салыстырғанда 6,4 пайызға артық.

 «Меншікті газ ресурстық базасын кеңейту мақсатында Қашағанда қуаты 1 млрд текше метр және 2,5 млрд текше метр болатын ірі газ өңдеу зауыттарын, сондай-ақ Жаңаөзен қаласында қуаты 0,9 млрд текше метр газ өңдеу зауытын іске асыру жұмыстары жүргізілуде. 2025 жылы инвестиция көлемі 100 млрд теңгеден асады, – деді ҚР Энергетика министрі Алмасадам Сәтқалиев.

Оқи отырыңыз: Қоғамдық көлік пен арнайы техниканы жаңартуға 109 миллиард теңге қажет – министр