Елімізде лаңкестікті қаржыландыруға қарсы әрекет күшейтіледі

Елімізде қылмыстық жолмен алынған кірісті заңдастыру мен лаңкестікті қаржыландыруға қарсы әрекет күшейтіледі. Сенат депутутаттары Еуразиялық топтың хаттамасын мақұлдады, деп хабарлайды Almaty.tv тілшісі.

Халықаралық стандарттарға сәйкес терроризмді қаржыландыру және қылмыстық жолмен алынған кірістерді заңдастыруда коммерциялық емес ұйымдарға ерекше назар аударылады. Мемлекеттер аталған бірлестіктерді тұрақты бақылап отыруы тиіс. Осы тұста Сенатор Әлішер Сатыбалдиев Қаржылық мониторинг агенттігінің өкілінен «біздегі коммерциялық ұйымдарды бәзбіреулер заңға қайшы мақсатта пайдаланып кетпес үшін қосымша қандай шаралар қабылдайсыздар» деп сұрады. Өйткені былтыр еліміздегі 26 қайырымдылық ұйымында экстремистік әдебиеттер табылыпты. Өз кезегінде Жеңіс Елемесов «агенттік тұрақты түрде мониторинг жүргізіп отыр» деп қысқа қайырды.

 «Тәуекелді бағалау жүйесіне сәйкес комерциялық емес ұйымдар қылмыстық жолмен тапқан ақшаны жылыстатуға осал. Депутаттармен бірлесіп коммерциялық емес ұйымдарға мониторинг мүмкіндіктерін кеңейтуге қатысты заң жобасы талқыланды», – деді ҚР Қаржылық мониторинг агенттігі төрағасының орынбасары Жеңіс Елемесов.

Сенат отырысында білім беру мекемелері тапшылығы туралы да сөз қозғалды. Депутат Талғат Жүнісовтің айтуынша, «Жайлы мектеп» ұлттық жобасынан Ақмола облысы бойынша 10 мың 800 орындық 9 мектеп алынып тасталған. Ал бас қалаға қоныстанушылардың саны жыл сайын артқандықтан, өңірге білім ошақтарын көптеп салу керек. Астана іргесіндегі Қосшы қаласына 1500 орынға арналған оқу ордасы қажет.

 «Қосшыда 8 жалпы білім беретін мектеп, оның ішінде бір жекеменшік дара мектебі жұмыс істейді. Барлық мектептердің жобалық қуаты 7260 орын. Ал оқушылар контингенті 12 мың 10 баланы құрайды. Сондай-ақ қаланың Лесная поляна және 20-шағынаудандарынан 600 оқушы қала мектептеріне тасымалданады. Көкшетау қаласы Бейбітшілік шағынауданында 1500 орындық мектеп қажет», – деді ҚР Парламенті Сенатының депутаты Талғат Жүнісов.

Кезек-кезек сөз алған сенаторлар су саласындағы мамандардың тапшылығы жайлы, қауіпсіздік туралы айтып, «апаттардың алдын алу үшін бақылауды күшейту қажет» деп Премьер-министр Олжас Бектеновке сауал жолдады.

Аршат Әділжанқызы, Данияр Омар, Нұрлан Өтеген, Дастан Теміррбекұлы, Астана