Ескі пойыздарға интернет орнатыла ма

ҚР ЦДИАӨМ Телекоммуникациялар комитетінің төрағасы Дамир Сейсембеков Қазақстан пойыздарына қашан интернет қосылатынын айтты, деп хабарлайды Almaty.tv тілшісі ҚазАқпаратқа сілтеме жасап.

Биыл қаңтар айында Астана-Алматы бағыты бойынша жүретін пойызда жолаушыларға арналған спутниктік интернет іске қосылды. Әзірге бұл интернеті бар жалғыз бағыт.

"Қазір бұл вагондарда тестілеу кезеңі жүріп жатыр, жалпы алғанда жолаушылардың пікірі жақсы. Нақты мерзімдер туралы қате ақпарат бергім келмейді, бірақ техникалық пилоттық жоба алғашқы жартыжылдықта аяқталады деп ойлаймын, өйткені бұл әлі сынақ жобасы. Бізде интернет қызметін ұсынатын провайдер бар, ал пилоттық жоба аяқталған соң, оның экономикалық тиімділігін ескеру қажет. Жаңа жүйені енгізу кезең-кезеңімен жүзеге асады, ең алдымен жолаушылар ағыны көп бағыттарда орнатылады. Бізде кейбір пойыздар мүлдем мобильді байланысы жоқ маршруттармен жүреді, сондықтан алдымен сол бағыттарда интернет жүргізіледі", — деді Дамир Сейсембеков Үкіметтегі брифингте.

Оның айтуынша, интернет тек «Тальго» үлгісіндегі пойыздарда ғана қолжетімді болады.

"ҚТЖ мәліметінше, елімізде шамамен 16 бағытта «Тальго» пойыздары жүреді. Техникалық тұрғыдан алғанда, дәл осы пойыздар ішінде интернет тарату мүмкіндігі бар. Ал ескі, кеңес дәуірінен қалған пойыздарға бұл жүйені енгізу мүмкін емес. Сондықтан қазір біз ҚТЖ-мен бірлесіп, барлық 16 бағытта толыққанды интернетпен қамту жоспарын әзірлеп жатырмыз", — деп толықтырды спикер.

Оқи отырыңыз: Мьянмадағы жойқын жер сілкінісінен қаза тапқандар саны артты