Ғасырлық мерейтой: Астанада «Құстар әні» фестивалі өтіп жатыр

Астанада өмірін өнерге арнаған дара тұлға, композитор Нұрғиса Тілендиевтің 100 жылдығына арналған «Құстар әні» фестивалі өтіп жатыр, деп хабарлайды Almaty.tv тілшісі.

Іс-шараға еліміздің түкпір-түкпірінен келген өнер ұжымдары қатысуда. Оның ішінде даңқты дирижердің замандастары да бар. Ал күні кеше  Нұрғиса Тілендиев негізін қалаған «Отырар сазы» оркестрі арнайы кеш өткізді.

«Отырар сазы» оркестрі елорда төрінде Нұрғиса Тілендиевтің халық арасында кеңінен танылған туындыларын орындады. Іс-шараға даңқты дирижердің көзін көрген замандастары мен шәкірттері келді. Олар сазгердің қазақ музыкасына қосқан үлесін айтып, естеліктерін бөлісті.

 «Бізге туған балаларындай қарайтын. Әр өнерпазды бағалап, құрметтейтін. Әрдайым маған, бүкіл оркестрге «мен үшін орны бөлек жансыңдар, сендерді жақсы көремін», – деп айтып отыратын», – деді ҚР еңбек сіңірген әртісі Тұрсынхан Қарақожаева.

 « Нұрғиса Тілендиев –  Ақан сері, Біржан сал, Тәттімбеттердің заңды жалғасы,  ұлылардың соңғы тұяғы», – деді ҚР еңбек сіңірген қайраткері Ермұрат Үсенов.

 «Ол халқын сүйетін тұлға болды. Сахнаға шыққанда шабыттанып, өзгеріп кетуші еді. Ол Махамбеттей қолбасшы болды. Ал біз өнердегі әскерлері сияқты артынан еретінбіз», – деді ҚР халық әртісі Майгүл Қазтұрғанова.

Композитордың сырлы әуендері, жүректі тербейтін күйлері ұлттық музыканың қазынасына айналған. Ұйымдастырушылардың айтуынша, фестивальдің басты мақсаты – өшпес шығармаларды тиісті деңгейде ұлықтау.

 «Бүгінгі таңда 10 облыстың филормониясынан өнерпазда келіп атсалысып жатыр. Фестиваль 3 күнге созылды. Дөңгелек үстелден басталды,  қызы Дінзухра Тілендиеваның бастамасыменен Нұр ағаның құрған оркестрі «Отырар сазының» концерті өтті», – деді Е. Рахмадиев атындағы Мемлекеттік академиялық филармонияның бас директоры Ерлан Дакенов.

Елорда тұрғындарына еліміздің әр өңірінен келген өнер ұжымдары өнерін көрсетеді. Ал ертең фестивальдің жабылу салтанаты өтеді.

Мәди Бижан, Данияр Омар, Дастан Темірбекұлы, Астана

Оқи отырыңыз: Ғасырлық мерейтой: Астанада «Әлқисса-Нұрғиса» атты концерт өтті