Қалың малды мәһір деп санауға болады - ҚМДБ

Қалың малды мәһір деп санауға болады. Бұл пәутаны Қазақстан мұсылмандары діни басқармасының Ғұламалар кеңесі мәлімдеді, деп хабарлайды Almaty.tv.

Қазақ дәстүріндегі қалыңмалды ислам шариғатындағы мәһір деп есептеуге қатысты ғалымдардың бірнеше көзқарасы бар:

Кейбір Хорезмдық және одан да басқа ғалымдар қыздың артынан келетін қалыңмалды тездетіп берілетін мәһір деп санаған

 Имам әл-Касани «Неке қию барысында қыз разылығын ашық айтуға ұялғанындай, мәһірін сұрауға да қысылады. Қыздың үндемеуі оның разылығын білдіргеніндей, мәһірін әкесі алып жатқанда да үндемеуі разы екендігін білдіреді. Әдетте әкесі мәһірді алғаннан кейін үстіне қаражат қосып, қыздың артынан жиһазын алып барады» деген

Кейбір ғалымдар қалыңмалды ұзатылып жатқан қызға белгілі бір нәрсенің есесіне берілетін сыйлық деп білген.

Ибн Абидин «Неке қиярда «дустиманды» мәһір деп айтса, онда ол тездетіліп берілген мәһір есебінде болады әрі күйеуі жасауын алып келуді талап ете алмайды. Ал неке қиярда мәһір деп айтылмаса, ол қарымта қайтару шартымен берілген сыйлық болып саналады. Мұндай жағдайда әдет-ғұрыпқа сай қыз тарапынан жасау талап ете алады» деген.

Қазақ дәстүрінде қалыңмал – қалыңдық үшін берілетін мал-дүние. Егер екі жас ажырасқан жағдайда қалыңдық малы қыздың иелігінде қалатын болған. Осы тұрғыдан қалыңмалды мәһір деп санауға болады.

Ал «әке еңбегі», «ана сүті», қыздың әке-шешесіне, туыстарына берілетін мал-мүлік мәһірге саналмайды. Сондай-ақ қыздың жасауын әкесі өз мүлкінен алып берсе, бұл мәһір болып есептелмейді.

Қалыңмал берілмейтін өлкелерде неке қию барысында мәһірді белгілеуі тиіс. Мәһір белгіленбеген жағдайда некесі дұрыс болады. Бірақ күйеуі мәһір-мисл береді.

Оқи отырыңыз: Құмды су ішіп отырмыз: тұрғындар тіршілік нәрінен тарығып отыр