Мопедке мемлекеттік нөмір алу мерзімі қашан аяқталады

Ішкі істер министрінің орынбасары Игорь Лепеха Мәжілістің жалпы отырысынан кейін мопедін тіркеп үлгермеген қазақстандықтарға үндеу жасады, деп хабарлайды Almaty.tv ҚазАқпаратқа сілтеме жасап.

"Мопедтер бойынша айтсам, жауапкершілік күшіне енеді. Депутаттар бүкіл мопед жүргізуші куәлігін алып, тіркеліп үлгерсін деп әдейі ұзақ мерзім белгілеген болатын. Өте көп уақыт берілді. Кейінгі кезде күн сайын мопедтеріңізді есепке қойып, жүргізуші куәлігін алыңыздар деген мәнде үндеу тастап жатырмыз. Тіпті Азаматтарға арналған үкімет корпорациясынан жұмыс уақытын ұзартуды сұрадық", - деді ол.

ІІМ өкілі заң талабына бағынбағандарды қандай жаза күтіп тұрғанын еске салды.

"5 сәуірден бастап азамат жүргізуші куәлігі мен мемлекеттік тіркеу нөмірі жоқ мопед жүргізсе, әкімшілік жауапкершілікке тартылады. Мопед айып тұрағына алынып, мемлекеттік тіркеу нөмірін алғанша иесіне қайтарылмайды. Сондықтан баршаңызға мопедтеріңізді тіркетіп үлгеріңіздер дегім келеді", - деді Игорь Лепеха.

Оқи отырыңыз: Алматыда тіркелген мопед саны 5 мыңнан асты