Наурыз айындағы ҰБТ-ны бір аптада 21 мыңға жуық талапкер тапсырды

Наурыз айындағы Ұлттық бірыңғай тестілеудің бірінші аптасында 21 мыңға жуық талапкер сынақ тапсырды. Олардың 57%-ы шекті баллдан өтті, ал орташа көрсеткіш – 53 балл болды. Ең жоғары нәтиже – 135 балды Абай облысының бір түлегі жинады, деп хабарлайды Almaty.tv тілшісі ҚР Ғылым және жоғары білім министрлігінің баспасөз қызметіне сілтеме жасап.

«Тестілеуге қатысқандардың 62,8%-ы қазақ тілінде, 37%-ы орыс тілінде, ал 52 адам ағылшын тілінде тапсырды. Ең көп таңдалған пән комбинациясы – «Математика-Физика» (18,4%), одан кейін «Шығармашылық емтихан» (16,1%) және «Биология-Химия» (12%). Ал ең аз сұранысқа ие болған комбинация – «Химия-Физика», оны небәрі 35 адам таңдаған», — делінген хабарламада.

ҰБТ кезінде ерекше білім беру қажеттіліктері бар 69 талапкерге арнайы жағдай жасалды. Сонымен қатар тестілеу нәтижелері 22 талапкер үшін жойылды. Оның ішінде 10 адам тыйым салынған заттарды – смартфондар мен шпаргалкаларды алып кіруге тырысқаны үшін тест тапсыру мүмкіндігінен айырылды, ал 12 талапкер аудиторияда тәртіп бұзғаны үшін шығарылды. ҰБТ-ны басқа адам тапсыруға тырысқан фактілер тіркелген жоқ.

Оқи отырыңыз: Астанада жүргізушілер жолда төбелес шығарды