Талдықорғандықтарды батпақ басқан жол қажытты

Талдықорғанда «Солтүстік-Батыс» тұрғын үй алабының тұрғындары наразылық білдірді. Көшеге шыққан жұрт жылдар бойы жол мәселесін қаузап, әбден шаршағанын айттты. Олар жолдан бөлек, балалар алаңы, қоғамдық көлік, көшені жарықтандыру жайын біржақты етуді сұрайды, деп хабарлайды Almaty.tv тілшісі.

Қаланың солтүстік-батысындағы алғашқы үйлер 2008 жылы салынған. Содан бері 30-ға жуық көше пайда болған. Мұнда тұрып жатқан мыңдаған тұрғын инфрақұрылым  мәселелерінен қажығанын айтады. Олар ең алдымен жол салып беруді сұрайды. Өйткені 27 көшеге асфальт төселмеген.

 «17 жылдан бері топырақ сазды кешіп жүрміз. Талдықорғанның жанында отырмыз, шеткі аудан көшелерінде асфальт төселді, тек осы жер қалды. 2024 жылы қала әкімінің қабылдауына бардым. Ол кісі жақын уақытта көше жөнделмейтінін айтқан. «Бюджетте ақша жоқ, салынса да 2-3 жылдан кейін салынады» деген. Тағы 10 жыл жолдың мәселесі шешілмейтін сияқты», – деді Талдықорған қаласының тұрғыны Ләззат Заитова.

Мұнда қатынайтын қоғамдық көлік шағынауданның сыртына тоқтайды. Шеткі көшелердің тұрғындары аялдамаға жету үшін шамамен 1-2 шақырымдай  жаяу жүруге мәжбүр. Олар елдімекен ішіне автобус аялдамаларын белгілеуді сұрайды. Шағынауданда электр сымдары да талапқа сай тартылмаған.

 «Ақберен көшесінде ескі 7 баған тұр. Ертең темір біреудің басына құласа, мәселе басқадай болады», – деді Талдықорған қаласының тұрғыны Гүлбаршын Қабылқайырқызы 

Жұрт мұның барлығын айтып, әкімдіктің табалдырығын талай тоздырған. Бірақ нәтиже болмаған. Ал жергілікті билік жол салуға ғана 6,6 млрд теңге кететінін, биыл бюджеттен қаржы бөлінбегенін айтты. 

«Ол жерде 27 көше. Көшелердің бәріне инертті  материалдан  төселіп жол жасалған.  Бірақ қатты жабынды, асфальт төселмеді.  Жобалақы сметалық құжаттама әзірленген, мемлекеттік сараптаманың оң қорытындысы бар. Бюджетке өтінім берілген, әзірге қаражат бөлінген жоқ. Республикалық, облыстық, жергілікті бюджетке де өтінім берілген.  Бірақ ақша бөлінген жоқ», – деді Талдықорған қалалық Жолаушылар көлігі және автомобиль жолдары бөлімінің басшысы Ерлан Ниетбаев.

Әкімдіктегілер көшені жарықтандыру да, аялдама салу да жол жөнделген соң ғана қолға алынатынын жеткізді. Бірақ шенеуніктер 30-ға жуық көшеге қашан асфальт жол түсетінін нақты айта алмай отыр. 

Меруерт Сабыртай, Мирас Анитов

Оқи отырыңыз: Түркістан облысында насыбай шығаратын жасырын цех жойылды