Шымкентте таксиге отырған бойжеткенді бір топ еркек зорлап кеткен

Таксиге мінген бойжеткен жүргізушінің құрбанына айналды. Шымкентте 22 жастағы қызды бір топ еркек зорлап кетті. Күдікті ер адам қыздың мекенжайын біліп алып, аңдып жүріп, арам ойын іске асырған. Оқиғаға қатысты қылмыстық іс қозғалды, деп хабарлайды Аlmaty.tv.

Жаға ұстатарлық жағдай 21 наурызда болған. Үш еркек студент қызды көлікке күштеп отырғызып, қаланың шетіне апарып зорлаған. Мұны жәбірленушінің анасы айтып отыр. Ең сорақысы, күдіктілер 8 айдан бері бойжеткенді қорқытып, қорлап келген көрінеді. Анасы үйде ешкім жоқ кезде, баса-көктеп кіріп, айуандыққа барған кездері де болған деп отыр.

«Үйдің ауласында өздерінің жаман қылықтарын істеген. Екіншісі оны видеоға түсіріп алған. Сөйтіп сол видеомен қызды қорқыта бастаған. Бөлімшеге келгеннен кейін ешқандай жедел жұмыс істелмеген. Қыз отыра берген. Арыз жазам десе де жаздырмаған. Үйде бұл қызымнан кейін тағы 2 қызым бар бұдан кейін. Олар далаға шығуға қорқып қалған», - дейді қыздың анасы.

 Жәбірленуші тарап полицияның дер кезінде әрекет етпегеніне ашулы. Тергеудің уақытылы басталмағанын адвокат та растады. Тіпті, жұмысына салғырттық танытқан тергеушінің үстінен шағым түсіру жоспарланып отыр екен.

«ҚР ҚК 120 бабымен ешқандай іс қозғалмағанын білдік. Содан кейін прокуратураға шағымдандық. Өтініш хаттарды жолдадық», - деді адвокат Гулайхан Тұрсуманова.

Осыдан кейін ғана полиция «зорлау» бабымен қылмыстық іс қозғады. Қазір оқиғаның мән-жайы анықталып, тергеу амалдары жүргізіліп жатыр, - деді құқық қорғау органы.

 Ал жәбірленуші тарап «қызымды қорлағандар заң жүзінде жазалансын» деп отыр.

Лаура Бабас, Абзал Тұрабеков, «Алматы» телеарнасы үшін арнайы Шымкенттен

Оқи отырыңыз: "Немереңді аман-сау көргің келсе..." - БҚО-да егде әйелді бопсалағандар ұсталды