СҚО-да ауыл тұрғынының үйінен қару-жарақ арсеналы табылды

Солтүстік Қазақстан облысына қарасты Есіл ауданында «Мал ұрысы» және «Құқықтық тәртіп» жедел-профилактикалық іс-шаралары шеңберінде жұмыс істеген полиция қызметкерлері 44 жастағы тұрғынның үйінен ірі қару-жарақ арсеналын тапты, деп хабарлайды Аlmaty.tv облыстық полиця департаментінің баспасөз қызметіне сілтеме жасап.

Тексеру барысында полицейлер үйден «СКС» иір ұңғылы карабинін, тіркелмеген «ИЖ-К» тегіс ұңғылы мылтығын және аңшылық патронмен атуға болатын қолдан жасалған қаруды тапты.

«Сондай-ақ ер адамда ұсақ калибрлі винтовканың ұңғысы мен бекітпесі, тегіс ұңғылы мылтықтың ұңғысы мен түрлі калибрлі 700 патрон сақталған», - делінген ПД хабарламасында.

Барлық үлгілер тәркіленіп алынды, олар бойынша сараптама тағайындалады. Иір ұңғылы қаруды сақтау фактісі бойынша полиция қылмыстық іс қозғады.

«Ер адамның түрлі аң мен құс аулауға мүмкіндік беретін мұндай жиынтықты қайдан алғанын тергеу анықтайтын болады. Күдіктіге 5 мың айлық есептік көрсеткішке дейінгі мөлшерде ірі айыппұл салынуы немесе 5 жылға дейінгі мерзімге бас бостандығынан айырылуы мүмкін», - деп атап өтті полиция өкілдері.

Тәртіп сақшылары заңсыз сақталған қаруды өз еркімен тапсыру ғана қылмыстық және әкімшілік жауапкершіліктен босататынын еске салады.

Оқи отырыңыз: Ақтөбеде алаяқтық жасады деп күдіктелген бұрынғы шенеунік ақталып шықты