Түркістанда қызғалдақ гүлдеді

Түркістанда «Қызыл кітапқа» енген қызғалдақтар гүлдеді. Жауқазынның Борщов деп аталатын бұл түрі әдеттегідей тау бөктерінде кездесе бермейтінімен ерекше. Әрі суды аса қажет етпейді, құмды жерде өседі, деп хабарлайды Almaty.tv.

Алайда соңғы кезде табиғат жанашырлары гүлдердің жойылып кету қаупі бар екенін айтып, дабыл қаға бастады. Себебі оған қызығып, тамырымен жұлатындар көбейген. Бұл ретте табиғат қорғаушылары дала гүлін жұлғандарға 11 млн теңгеге дейін айыппұл салынатынын ескертеді. Әлемде қызғалдақтың 3 мыңға жуық түрі бар болса, елде оның 35 түрі өседі. Соның қатарында 18 түрлі қызғалдақ Қызыл кітапқа енгізілген. Мамандар бір жауқазынды жұлу - оның бір емес, 10 жылдық ғұмырын үзетінін ескертті.

 «Борщов қызғалдағының ерекшелігі құмды жерлерде өседі. Бұны кез келген жерден барып көру мүмкін емес. Себебі өте сирек кездеседі. Бұл ҚР «Қызыл кітабына» енген. Жұлған жағдайда қылмыстық жауапкершілікке тартылады», – деді Сырдария-Түркістан мемлекеттік өңірлік табиғи паркінің бөлім меңгерушісі Нұрила Төре.

Оқи отырыңыз: Алматыда 6 мыңнан астам бизнес нысанының төлқұжаттауы аяқталды