Тылсым күш: елімізде космоэнергетикаға қатысты қандай пікірлер бар

Науқастарды еммен емес энергиямен емдейтіндер көбейіп келеді, деп хабарлайды Almaty.tv тілшісі.

Раушан Аққұлқызының айтуынша, ғарыштан келетін тылсым энергияны игерген. Ол арқылы түрлі дертке шалдыққан жандарды емдеп жүр. Оның сөзінше, қандай да бір дәрі-дәрмекті пайдаланбай-ақ, аутизм, даун синдромы, эпилепсия сынды сырқаттарды жазуға болады. Тіпті шыққан немесе сынған сүйекті сала алады. Ол үшін ауырған жеріңізге қолыңызды қойсаңыз жеткілікті.

"Бас ауру, тұмау деген сияқты ауруларды медицина емдей алады. Дұрыс па? Ал дәрігер емдемейтін, жаны ауырып жатқан адамдарды осы тәсілмен емдеу керек. «Жындармен жұмыс жасайды» деп ойлауы мүмкін. Жоқ, олардың қатысы жоқ. Бұл – таза физика. Дінге де, адамға да ешқандай қатысы жоқ", – деді космоэнергет Раушан Аққұлқызы

"Энергиядан ем таптым" деген Мархабо Сайдуллаеваның төртінші сәбиіне дәрігерлер Даун синдромы диагнозын қойып, баланы алдыруға кеңес берген. Алайда ана үмітін үзбей ем алған. Нәтижесінде сап-сау баланы дүниеге келді.

"Бірінші скринингке түстім. Сол кезде "баланың басында су бар, балаңыз жақсы дамып жатқан жоқ" деді. Раушан ханымды естіп, қаралдым. Ем шаралары басталғанда іштегі балада өзгеріс байқалды. Дәрілгерлер қағазға қарап, бетіме қарап, сенбейді", – деді қала тұрғыны Мархабо Сайдуллаева.

Ал Айнагүл Өтемұратова ғарыштық энергияның сырын өзі де меңгеріп алған көрінеді. Өзі сынды космоэнергеттерден сабақ алған оның айтуынша, эпилепсияға шалдыққан баламды емдеген.

"Аллаға шүкір, балам атының Мансұр екенін, анасы екенімді білді. Дәртеханаға өзі барады. Мысалы тәтті берсем, аузына сала салатын. Оның қағазын аршып, жеу керек екенін білмейтін. Қазір "қағазын аршып бер" деп өзіме береді", – деді қала тұрғыны Айнагүл Өтемұратова.  

Бір қызығы, космоэнергетика Ресей, Қытай, Жапония секілді әлемдік державаларда кең тараған. Алайда Еуропа елдері бұл емдеу тәсілін мүлдем қолданбайтын көрінеді. Алайда қазақстандық дәрігерлер космоэнергетиканың әзірге ғылыми түрде дәлелденбегенін айтты. Сондықтан олар емнің бұл түрін қабылдауға кеңес бермейді. 

"Космоэнергетика қазіргі заманғы медицинаның немесе ғылымның ресми мойындаған саласы емес. Бұл әдісті дәстүрлі емес немесе альтернативті емдеу тәсілі ретінде қарастыруға болады. Бірақ оның тиімділігіне қатысты жеткілікті ғылыми дәлелдер жоқ. Аутизм, эпилепсия сияқты күрделі неврологиялық ауруларды емдеу үшін дәлелденген әдістер, соның ішінде дәрі-дәрмек, терапия, арнайы бағдарламаларды қолданған дұрыс", – деді  № 2 Шымкент қалалық аурухананың бас дәрігері Бақытжан Позилов.

Ал исламда космоэнергетика сияқты тылсым күштерге немесе энергияларға байланысты нақты түсінік жоқ. Имамдар да «негізсіз және ғылыми дәлелсіз дүниелерге сенбеген жөн» деп санайды.

"Шариғатта ем-домның мұндай түрі қарастырылмаған. Көзімізге көрінетін дүниелермен емделу керек. Қарапайым дәрі ішкеннің өзінде де ол дәрі себеп ретінде қолданылады. Оның емін Алла береді деген сенім болуы керек", – деді Абдуссаттар Сманов мешітінің имамы Берік Шотабеков.

Космоэнергетика – әлі толық құпиясы ашылмаған тылсым әлем. Дегенмен, дәрігерлер қандай да бір энергияның барын жоққа шығармайды. Оның емдеу тәсілі ғылыми негіз тапқанда ғана тәжірибеге еніп, түрлі дертке шипа табуы бек мүмкін.

Лаура Бабас, Давран Әбдиев, Абзал Тұрабеков, Шымкенттен

Оқи отырыңыз: Жасанды интеллект науқастарға диагноз қояды