WhatsApp арқылы өзгені балағаттаған әйел 500 мың теңге төлейтін болды

Астана қаласының қылмыстық істер жөніндегі ауданаралық соты қорлау фактісі бойынша жергілікті тұрғынға қатысты қылмыстық істі қарады, деп хабарлайды Almaty.tv.

Сот хабарламасынан белгілі болғандай, 2024 жылғы 8 қыркүйек пен 20 қазан аралығында сотталушы К. «WhatsApp» мобильді қосымшасы арқылы М.-ға мәтіндік және аудио хабарламалар жіберген.

«Онда бейәдеп сөздер айтып, соңғысын әдепсіз түрде қорлап, осылайша оның ар-намысы мен қадір-қасиетіне нұқсан келтірген», - делінген хабарламада.

Жеке айыптаушы М. айыптауды қолдап, санкция аясында жаза тағайындауды сұрады.

Сот сотталушының шын жүректен өкінуін және оның жас баласының болуын қылмыстық жауапкершілік пен жазаны жеңілдететін мән-жайлар ретінде таныды.

«Сот К.-ны Қылмыстық кодекстің 131-бабының 1-бөлігі бойынша кінәлі деп танып, оған 20 АЕК мөлшерінде (73 840 теңге сомасында) айыппұл түрінде жаза тағайындады. Сондай-ақ сотталған К.-дан жәбірленушінің пайдасына моральдық зиянды өтеу есебіне 100 000 теңге, өкілдік шығыстарына 250 000 теңге, сараптама жүргізуге 130 000 теңге мөлшерінде шығыстар өндірілді», - делінген хабарламада.

Сот үкімі заңды күшіне енген жоқ.

Оқи отырыңыз: Алматы зообағындағы ақ аюлардың ұрпағы әлемнің әр түкпіріне тарап кеткен