Президент Сауд Арабиясы корольдігіне құттықтау жеделхаттарын жолдады

22.02.2025 11:17

Қасым-Жомарт Тоқаев Сауд Арабиясының королі мен тақ мұрагерінің толағай табыс, халқына құт-береке тіледі

Ақорда

Қасым-Жомарт Тоқаев Қос киенің сақшысы, Сауд Арабиясының королі Салман бен Әбделазиз Әл Саудты және осы елдің тақ мұрагері, Премьер-министрі ханзада Мұхаммед бен Салманды корольдіктің негізі қаланған күнмен құттықтады, деп хабарлайды Almaty.tv Ақорданың баспасөз қызметіне сілтеме жасап.

Мемлекет басшысы жеделхаттарда халықаралық қауымдастық Сауд Арабиясын экономикасы қарқынды дамыған, іргесі берік, беделді мемлекет ретінде танитынын жазған. Сондай-ақ Корольдік Қазақстанның ислам және араб әлеміндегі сенімді әрі маңызды серіктестерінің бірі екенін атап өткен.

«Қасым-Жомарт Тоқаев екі ел арасындағы мазмұнды саяси диалогқа негізделген ынтымақтастық алдағы уақытта да сауда-экономикалық және мәдени-гуманитарлық байланыстардың қарқынды дамуына серпін беретініне сенім білдірді», - делінген хабарламада.

Қазақстан Президенті Сауд Арабиясының королі мен тақ мұрагерінің жауапты қызметтеріне толағай табыс, халқына құт-береке тіледі.

Оқи отырыңыз: Жазушы Дулат Исабеков дүниеден өтті: Президент көңіл айтты