Қазақстан әйелдер құрамасының әлем чемпионатындағы жеткен жетістігі қандай

Бірнеше жылдық үзілістен кейін ұлттық құрама жоғары нәтижеге қол жеткізіп, ел қоржынына үш алтын, екі күміс және бір қола медаль салды, деп хабарлайды Almaty.tv.

Бұл көрсеткіш – Қазақстан әйелдер құрамасының әлемдік аренадағы орнының нығайғанының белгісі. Бұған дейін әйелдер құрамасы 2016 жылы елордада өткен әлем біріншілігінде 4 алтын, 2 қола медаль жеңіп алған еді.

Отандық боксшылардың жетістігі:
Биылғы додаға Қазақстан толық құраммен қатысты. Турнир барысында жерлестеріміз 35 жекпе-жек өткізіп, оның 26-сында жеңіске жетті.

Алтын медаль иегерлері:

•  Назым Қызайбай (48 келі) – тәжірибелі боксшы, бұл жеңісімен Қазақстан тарихындағы тұңғыш үш дүркін әлем чемпионы атанды. Ол бұған дейін 2014 және 2016 жылдары әлем біріншілігінде топ жарған.

Мемлекет басшысы Қасым-Жомарт Тоқаев Назымды әлем чемпионатындағы тарихи жеңісімен құттықтап, оған зор табыс тіледі.

"Назым Қызайбайды отандық бокс тарихында тұңғыш рет үш дүркін әлем чемпионы болуымен құттықтаймын. Бұл – айтулы жетістік! Сербиядағы әлем біріншілігінде үздік нәтиже көрсеткен ұлттық құрама мүшелеріне алғыс айтамын. Спортшы қыздарымыздың алдағы уақытта да үлкен жеңістерге жете беруіне тілектестік білдіремін", – деді Президент.

• Алуа Балқыбекова (50 келі) финалда қытайлық боксшыны айқын басымдықпен (5:0) жеңіп, әлем чемпионатының барлық жүлде жиынтығын иеленген боксшы атанды. Жерлесіміз бұған дейін 2022 жылы Түркиядағы әлем чемпионатында күміс, 2023 жылы Үндістандағы дода қола медаль жеңіп алған еді.
• Аида Әбікеева (63 келі) – өзінің шеберлігін дәлелдеп, финалда сенімді жеңіске жетті. Осылайша, былтыр Азия біріншілігінде үздік шыққан ол биыл әлемдік деңгейдегі алғашқы алтын медалін иеленді.

Күміс жүлдегерлер:

•  Виктория Графеева (60 келі) – финалға дейін сенімді өнер көрсетіп, ақтық сында ғана қарсыласына есе жіберді.
• Елдана Тәліпова (+81 келі) – ауыр салмақтағы еліміздің ең үздік боксшылардың бірі екенін дәлелдеп, күміс жүлдеге ие болды.

Қола жүлде:

• Наталья Богданова (70 келі) – жартылай финалда жеңіліс тапқанымен, әлемдік деңгейдегі үздік үштіктің қатарынан көрінді.

Чемпионаттағы ерекшеліктер:

• Қазақстан әйелдер құрамасы бұл әлем чемпионатында өз тарихындағы ең үздік көрсеткіштердің бірін көрсетті.
• Жарысқа 51 мемлекеттің өкілдері қатысты. Ал Қазақстан, Сербия, Ресей және Өзбекстан боксшылары толық құраммен бақ сынады.
• Жекпе-жектердің екеуінде жеңіс қазақстандық боксшыларға қарсыластары рингке шықпағандықтан, автоматты түрде берілді.

Жалпыкомандалық есеп
Қазақстан бұл чемпионатта жалпыкомандалық есепте екінші орынға тұрақтады.
 1-орын: Ресей – 4 алтын, 1 күміс, 2 қола
 2-орын: Қазақстан – 3 алтын, 2 күміс, 1 қола
 3-орын: Түркия – 1 алтын, 2 күміс, 2 қола
Бұл чемпионат қазақстандық спортшылардың әлеуетін тағы бір мәрте дәлелдеді. Сербиядағы тарихи жетістік – алдағы жарыстарға тың серпін беретін маңызды кезең.

Оқи отырыңыз: "Ордабасы" футбол клубының капитаны қанша жалақы алады