Қазақстан каратэшілері БАӘ-де чемпион атанды

Бүгін екі қазақ каратэшісі Біріккен Араб Әмірліктерінің Фуджайра қаласында өтіп жатқан жастар арасындағы А сериясы жарысында чемпион атанды, деп хабарлайды Almaty.tv тілшісі Sports24.kz-ке сілтеме жасап.

«Кумите бағдарламасында (U14-15) Нұрасыл Нұрсейіт (-52 кг) аса тартысты өткен финалда Украина өкілі Максим Виечкановты ұтты. Ал Сұңқар Қанибек 70 кг дейінгі салмақтың финалында Хорватия өкілін жеңді. Екі спортшымыз жарыс барысында 7 жекпе-жектен өткізді», - делінген хабарламада.

Сонымен қатар бүгін 14-15 жас санатында тағы 3 спортшымыз қола медаль жеңіп алды. Амир Кеңесбай (-52 кг), Руслан Еркін (-57 кг), Батыр Әділ (-57 кг) өз салмағында үздік үштікті түйіндеді.

Қазір Қазақстан командасында жүлде саны 8-ге жетті. Кеше Дінмұхаммед Айдарбек (U16-17) чемпион атанды, ал Гүлнұр Қойшыбай (U16-17) мен Ақниет Шеризат U21 санатында (55 кг) қола жүлдеге қол жеткізген еді.

Фуджейрадағы дәстүрлі жарыс ертең аяқталады. Барлығы осы жылы 87 мемлекеттен 2400-ге жуық спортшы қатысуда.

Оқи отырыңыз: Қазақстандық гимнаст әлем кубогы кезеңінде алтын медаль жеңіп алды