Алматыда жыл басынан бері құқықбұзушылық саны 20 пайызға азайған

Алматыда 11 айдың ішінде құқықбұзушылық саны былтырғымен салыстырғанда 20 пайызға азайған, деп хабарлайды Almaty.tv тілшісі.

Десе де, сала мамандары қоғамдық қауіпсіздікті қамтамасыз ету үшін рейдтік іс-шаралардың толастамайтынын айтады. Мәселен, 16 қыркүйекте басталған «Таза қала» науқанының аясында 3600-ден аса адам қаланың көркін бұзғаны үшін, ал 5000-ға жуық тұрғын қоғамдық орынды ластағаны үшін жауапкершілікке тартылған.

 "Қаланың абаттандыру сипатын бұзғаны үшін 505-баппен жауапкершілікке тартылады. Онда азаматтарға салынатын айыппұл мөлшері 20 АЕК-тен басталады. Қазіргі таңда ол шамамен 74 мың теңге болмақ. Егер де заңды тұлғалар болса, 110 мың теңгеден жоғары айыппұл салынады. 441-бап дегеніміз - темекі бұйымдарын, қорқорды қоғамдық орындарда тұтыну. Ол жерде де айыппұл саны азаматтарға 74 мың теңгеден жоғары айыппұл салынады", - деді Полиция департаменті жергілікті полиция қызметі басқармасы бастығының орынбасары Айтан Елеусізов.

Ал Алматының Жетісу ауданында өткізілген "Қауіпсіз қоғам" науқанының аясында белгіленбеген орындарда темекі шеккен, қоғамдық орындарды ластаған, сондай-ақ тыныштықты бұзған азаматтар анықталып, оларға түсіндірме жұмысы жүргізілді.

Еске салайық, бұл бастама Мемлекет басшысының "Заң мен Тәртіп" қағидатын іске асыруға бағытталған.  

"Жалпы мақсаты - қоғамдық орындарда тәртіп бұзушылықтың алдын алу және заң тәртіпті сақтау болып есептеледі. Барша қала тұрғындарын осы акцияда белсенді болуға шақырамыз", - деді Жетісу ауданы комьюнити орталығының менеджері Жанар Әбдіқадірова.

Оқи отырыңыз: Жамбыл облысында мектеп асханаларынан жүзге тарта кемшілік анықталды