Astana Hub инновациялық технологиялар паркімен біріктіріледі

Astana Hub инновациялық технологиялар паркімен біріктіріледі. Бұл – елдегі IT саласын дамытуға арналған қадам. Бүгін Мәжілісте депутаттар тиісті заң жобасын талқылады, деп хабарлайды Almaty.tv.

Екі орталықтың функциялары бір жерде шоғырландырылады. Нарыққа қатысушылар үшін біртұтас құқықтық алаң құрылмақ. Сондай-ақ бастама IT секторында жақсы нәтиже көрсеткен Astana Hub-тың  озық тәжірибесін кеңейтуге мүмкіндік береді. Құжатта енді Astana -қа тіркелген компаниялардың мүшелік жарна төлейтіні жазылған.

 «Сомасы, пайызы өзгермейді. Тек ұғымын өзгертіп жатырмыз. Демек оның нақты мақсатын дұрыстауға мүмкіндігіміз бар. Ұғымды ауыстырғаннан кейін, салыққа қатысты оітайландыру, стартаптарға көмек көрсету мүмкіндігі ұлғаяды», – деді ҚР Цифрлық даму, инновациялар және аэроғарыш өнеркәсібі министрі Жаслан Мәдиев.

Заң жобасына енгізілетін өзгерістерді депутаттардың бірі қолдаса, енді бірі «құжатта қауіпсіздік мәселесі шикі жазылған» дейді. Мәжілісмен Мұрат Әбенов «IT кәсіпкерлерге мүмкіндік бермес бұрын, халықты сан соқтырып жүргендерге тосқауыл болудың жолын қарастырмайсыз ба?» деп Цифрлық даму министріне шүйлікті. Оның айтуынша, алаяқтықтың 99 пайызы интернет арқылы жүзеге асады.

 «Азаматтар алаяқтарға 12 миллиард теңге аударған. Бұл 2023 жылғы көрсеткішпен салыстырғанда 3 есе көп. Қылмыстың тек 80 пайызы ғана ашылған, 30 пайыз ақша кері қайтарылған. Ал алданғандардың 70 пайызы қаражатын қайтара алмай жүр. Сіздер алдымен қауіпсіздікке ден қоюдың орнына бизнеске бар мүмкіндікті беріп жатырсыздар. Алайда қылмыс күн санап көбейіп бара жатыр», – деді ҚР Парламенті мәжілісінің депутаты Мұрат Әбенов.

Оқи отырыңыз: Медицина қызметкерлеріне біліктілік санатын беру қағидасы өзгерді