Несиені мерзімінен бұрын өтеген кезде нені ескеру керек

Несиені мерзімінен бұрын өтеу қарыз алушыға артық төлемді азайтуға және қарызды тезірек жабуға мүмкіндік береді. Алайда төлем жасамас бұрын бірнеше маңызды факторды ескеру қажет, деп хабарлайды Аlmaty.tv ҚР Қаржы нарығын реттеу және дамыту агенттігіне сілтеме жасап.

Біріншіден, шарт талаптарын тексеріңіз. Несие алмай тұрып банктен мерзімінен бұрын өтеу шарттарын нақтылаңыз. Қазақстан заңнамасы мұндай жағдайда айыппұл салуға тыйым салады, бірақ бірнеше талап бар:

• егер несие мерзімі бір жылға дейін болса, банк алғашқы алты ай ішінде кредитті толық өтеу кезінде өтемақы ұстауы мүмкін;
• егер несие бір жылдан ұзақ мерзімге рәсімделсе, алғашқы он екі ай ішінде кредитті өтеу кезінде айыппұл салынуы мүмкін.

Сондай-ақ банк берешекті мерзімінен бұрын өтеу үшін арнайы өтініш талап етпейтінін тексеру қажет.

Екіншіден, қарыз сомасын нақтылаңыз. Егер мерзімі өткен төлемдер немесе айыппұлдар болса, қаражат алдымен соларды өтеуге жұмсалуы мүмкін. Күтпеген шығындарға жол бермеу үшін банкке хабарласып, нақты қарыз сомасын анықтаңыз.

Үшіншіден, өтеу әдісін таңдаңыз. Мерзімінен бұрын өтеу толық немесе ішінара болуы мүмкін:

• Толық өтеу – қарыздың барлық сомасын, оның ішінде нақты пайдаланылған кезең үшін есептелген пайыздарды жабады.
• Ішінара өтеу – негізгі қарыз сомасын азайтады, артық төлемді төмендетеді. Бұл жағдайда несие мерзімін қысқарту немесе ай сайынғы төлем мөлшерін азайту нұсқалары ұсынылады. Әдетте, бірінші нұсқа тиімдірек.

Төртіншіден, несие төлеу тәртібін тексеріңіз. Кейбір банктер мерзімінен бұрын өтеуді арнайы мобильді қосымша арқылы жүргізуді немесе банк бөлімшесінде өтініш жазуды талап етеді. Егер қаражатты жай ғана шотқа салсаңыз, олар несие кестесіне сәйкес есептеліп, қарыз сомасы азаймауы мүмкін.

Бесіншіден, несие төленгенін растайтын анықтама алыңыз. Толық өтегеннен кейін, банктен қарыздың жабылғанын растайтын құжат талап етіңіз. Бұл есеп жүргізу кезінде қателіктердің алдын алуға көмектеседі.

Сонымен қатар кредиттік тарихты бақылау ұсынылады. Несие жабылғаннан кейін, кредиттік бюролардың сайттарында өз кредиттік тарихыңызды тексеріңіз. Егер қате анықталса, банкке немесе микроқаржы ұйымына (МҚҰ) жүгініп, растайтын құжаттарды ұсыныңыз. Сондай-ақ қате деректерді Fingramota.kz сайтындағы «Несие тарихын өзгерту» бөлімінде тегін түзете аласыз. Бұл жоба Қаржы нарығын реттеу және дамыту агенттігі мен Бірінші кредиттік бюроның бірлескен жұмысы аясында жүзеге асырылады. Өтінім беру үшін арнайы форманы толтырып, ЖСН мен телефон нөміріңізді көрсету қажет. Бірақ тек соңғы он жұмыс күні ішінде берілген кредиттік есепті ғана түзетуге болатынын ескерген жөн. 

Оқи отырыңыз: Несиені уақытында төлей алмасаңыз не істеу керек