Алматы мектептері мен колледждерінде сабақ болмайды

Алматы қаласының мектептері мен колледждерінде 1-ауысымдағы сабақтар болмайды, деп хабарлайды Almaty.tv.

«Қала мектептері мен колледждерінде түні бойы халықты қабылдау пункттері жұмыс істеуіне байланысты, 23 қаңтар күні Алматы қаласының мектептері мен колледждерінде 1-ауысымдағы сабақтар болмайды. Балабақшалар штаттық режимде жұмыс істейді, балаларды ата-аналардың қалауы бойынша әкелуге болады»,- деп хабарлады Алматы қалалық білім басқармасынан.

Еске салайық, түнде Алматыда 5 балл деңгейінде жер сілкінді. Алматылықтардың айтуынша, жерасты дүмпуі осы жолы қатты сезілді. Жер ұзақ уақыт бойы шайқалған. Тұрғындар үрейленіп, үйінен көшеге, далаға шығып кеткен.

Кейін Ұлттық сейсмологиялық бақылаулар мен зерттеулер ғылыми орталығының директоры Дәулет Сәрсенбаев Алматыда жақын уақытта күшті және жойқын жер сілкінісі болмайтынын жеткізді.