Қазақ детективінің дарабозы: жас шекарашылар соғыс ардагері Кемел Тоқаевтың шығармашылығымен танысты

Бүгін еліміздің жас шекарашылары Жетісу облысындағы мектеп мұражайында жазушы, соғыс ардагері Кемел Тоқаевтың шығармашылығымен танысты, деп хабарлайды Almaty.tv тілшісі.

 Ұлттық қауіпсіздік комитетіне қарасты Шекара қызметінің Алматы облыстық департаменті мен «Генералдар кеңесі» бірлестігі ұйымдастырған іс-шараға «Генералдар кеңесі» республикалық қоғамдық ұйымы Президиумының төрағасы генерал-лейтенант Б.Сәрсеков, ҰҚК Шекара қызметі Алматы облысы бойынша департаментінің бастығы полковник Ә.Каюпов, еліміздегі Журналистика академиясының академигі – Қазақстан Жазушылар одағы төрағасының кеңесшісі Н.Нұрғазин, шекарашы ардагерлердің «Застава тарландары» республикалық қоғамдық бірлестігі Алматы қалалық филиалының төрағасы запастағы полковник А.Мұналбаевтар қатысты. Сонымен қатар жиынға тартылғандардың қатарында департаменттің Сержанттарды даярлау мектебінде кәсіби біліктіліктерін көтеру курсынан өтіп жатқан әскери қызметшілермен бірге «Жас шекарашы» әскери-патриоттық клубының мүшелері қатысты.

Ұйымдастырушылардың айтуынша, шекарашыларға арналған танымдық іс-шараны өткізудегі басты мақсат – оларды ерлікке, елжандылыққа тәрбиелеу. Өйткені жазушының сұрапыл соғыстағы жауынгерлер туралы шығармалары көп. Мәселен «Солдат соғысқа кетті» романында майдан даласы ашық сипатталған. Бұған қаламгердің соғысты өз көзімен көргені себеп. Кемел Тоқаевтың 18 жасында майданға аттанып, Сталинград, Беларусь, Украинаны  азат етуге қатысқаны көпке мәлім. Жауынгер бұл батырлығы үшін екінші дүниежүзілік соғыстың І және ІІ дәрежелі ордендерімен және екі мәрте «Ерлігі үшін» медалімен марапатталған.

 «Алматыда  оқу орнынан, әр өңірден келіп,  сержант мектебін 1-2 ай оқып, қайта аймақтарға тарайды. Оларға музейді көрсетіп жатырмыз. Шынын айтқанда, қарапайым  әкеден  тұлға туып, ел басқарып Президент болды. Бұл жастарға үлгі болуы керек. Жақсы оқып, Отанын  сүйіп,  білімге құштар болса, ертең  өседі, өнеді. Қазақстанның нағыз азаматы болады деп сенеміз», – деді «Генералдар кеңесі» қоғамдық бірлестігі президиум төрағасы Бексұлтан Сәрсеков. 

Еліміздің түкпір-түкпірінен келген жас жауынгерлерді әсіресе  жазушының детектив жанрындағы туындылары қызықтырды. Олардың қатарында «Түнде атылған оқ», «Арнаулы тапсырма», «Сарғабанда болған оқиға», «Ұясынан безген құс» «Жұлдызды жорық», «Қыс қарлығашы», «Болашақ туралы ойлар», «Түнде атылған оқ», «Қастандық», «Арнаулы тапсырма», «Таңбалы ақын» повестері мен «Соңғы соққы» және «Солдат соғысқа кетті» сынды шығармалар бар.

«Мерзімді әскери қызметшімін. Дәл қазір сарбазбын. Үйіме қайтуыма 10 күн қалды. Бүгін музейге бірінші рет келіп тұрмын, тың ақпаратпен таныстым. Детектив жанрында кітап жазады екен. Бұл жанр маған қатты ұнайды. Бұйырса Алматы қаласындағы Ұлттық кітапханадан Кемел Тоқаевтың кітаптарын алып, оқимын», – деді қатардағы жауынгер Батырбек Асқарұлы.

 «Шекарашылар - 80 игі іс» атты іс-шара өткізіп жатырмыз. Бұл –  жастарға үлгі. Кемел Тоқаев, ағасы Қасым Тоқаев  соғыс кезінде  майданда болып, ерлік көрсетті. Алматы облысы бойынша мектептің  деңгейінде құрылған «жас шекарашылар» клубындағы оқушыларды әкеліп, көрсетіп жатырмыз», – деді ҚР ҰҚК Шекара қызметі Алматы облыстық департаменті бастығының орынбасары Талғат Табылдиев.   

Мектептің мәжіліс залында өткен алқалы жиыннан кейін білім ошағындағы музей табалдырығынан аттаған қонақтар Кемел Тоқаевтың «Түнде атылған оқ» шығармасы бойынша сахналанған қойылымды тамашалады. Бұдан әрі мектеп оқушылары жиынға қатысушылар үшін адалдық пен парасат суреткерінің шығармаларына негізделген «Жазушы әлеміне саяхат» атты зияткерлік ойын ұйымдастырды.

Жиналған қауым жазушының кабинет-мұражайында шығармашылығымен ғана емес, жеке өмірімен де танысты. 1997 жылы құрылған музейге қаламгердің киімдері, музыкалық аспаптары, фотосуреттері, құжаттары мен кітаптары қойылған. Іс-шара әскерилердің мектеп ауласына көшет отырғызуымен жалғасты.

Меруерт Сабыртай, Мирас Анитов, Жетісу облысы

Оқи отырыңыз: Наурызнама: Қарулы күштердің әскери қызметшілері көкпар тартып, теңге ілді