Қазақстандықтар обырдың қандай түрлеріне жиі шалдығады

Қазақстанда жыл сайын онкологиялық аурулардың 40 мыңға жуық жаңа жағдайы тіркеледі, ал обырдан жылына 12 мыңнан астам адам қайтыс болады, деп хабарлайды Аlmaty.tv ҚР Денсаулық сақтау министрлігінің баспасөз қызметіне сілтеме жасап.

Елімізде обырдың келесі түрлері ең көп таралған:

• Сүт безі обыры - 5 652 жағдай;
• Колоректалдық обыр - 4 029 жағдай;
• Өкпе обыры - 3 833 жағдай;
• Асқазан обыры - 2 907 жағдай;
• Жатыр мойны обыры - 1 921 жағдай.

2024 жылдың соңында 230 мыңнан астам онкологиялық пациент динамикалық бақылауда болды, бұл 2023 жылмен салыстырғанда 5,9%-ға артық.

Онкоскринингтерді, заманауи диагностикалық технологиялар мен емдеу әдістерін енгізу, сондай-ақ онкологиялық дәрігерлердің біліктілігін арттыру ауруларды ерте анықтау деңгейінің өсуіне және өлімнің төмендеуіне ықпал етті.

"Қабылданған шаралардың арқасында 2024 жылы 0-І сатысында онкологиялық аурулардың жаңа жағдайларының 31,4%-ын анықтауға, сондай-ақ қатерлі ісіктерден болатын өлімді 3,2%-ға төмендетуге мүмкіндік туды", - делінген министрлік хабарламасында.

Қазақстанда онкологиялық ауруларды диагностикалау және емдеу тегін медициналық көмектің кепілдік берілген көлемі (ТМККК) шеңберінде тегін ұсынылады. Мемлекет МӘМС жүйесіндегі пациенттің мәртебесіне қарамастан, онкологиялық ауруларды диагностикалауға, дәрі-дәрмекпен қамтамасыз етуге және емдеуге арналған барлық шығыстарды жабады.

Министрлік азаматтарды емханаларда үнемі тегін онкологиялық скринингтерден өтуге және онкологиялық ауруға күдік туындаған жағдайда дереу медициналық мекемелерге жүгінуге шақырады.

Оқи отырыңыз: Өлер алдында адам миы қалай жұмыс істейді - ғалымдар зерттеуі