"Кейде мүлде ақпайды": Қарағанды қаласының тұрғындары ауыз су тапшылығын көріп отыр

"Қарағанды қаласының қақ ортасында тұрсақ та, өркениеттен адамыз". Степной-1 шағынауданындағы бес қабатты үйдің тұрғындары құдды бір ауылдағыдай күй кешіп жүрміз деп шағым айтты. 8 жылдан бері ауыз судың азабын тартқан халық қолындағы құтыны толтыру үшін сағаттап күтеді екен, деп хабарлайды Аlmaty.tv.

Бес қабатты үйдің тұрғындары тіршілік нәрінен жылдар бойы тарығып келеді. Пәтер иелерінің айтуынша, жаңа құрылыс кешендерінің көптеп салынуынан баспаналардағы су қысымы күрт төмендеген. Гүлденсін Бекмұханбетова бұл үйде 40 жылға жуық тұрады. Сексеннің сеңгірінен асқан зейнеткер қалада тұрсақ та, қиналатынымыз бар деп қынжылады. Краннан сыздықтап аққан суды бөтелкеге екі сағатта әрең толтыратынын айтады.

«Бұл судың өзі болмай қалады. Кейде мүлде ақпай қалады. Бір ыдысты жуу үшін өте көп уақыт күту керек», - дейді қала тұрғыны Гүлденсін Бекмұханбетова.

Ауыз судың қысымы жұрт қалың ұйқыға кеткенде, түн ортасында ғана көтеріледі екен. Ағайын «жуынып-шайынудың өзі қиын» дейді.

Қысымның аздығынан тұрғындардың тұрмыстық техникалары да күйіп кетеді екен. Пәтер иелері шаш етектен шығынған баттық деп отыр.

«Қайта-қайта тоқтап қала береді. Су келмейді. Тоқтап қалған кезде кір жуа да алмаймын, қайтадан өшіремін. Су қайта тамшылап келген кезде, кір жуатын машинамды тағы қосамын. Істегеннен істемегені көп. Осының алдында бір машинам жаңа күйінде күйіп кетті. Енді мынаны былтыр ғана алдық, қорқамыз», - дейді қала тұрғыны Гүлденсін Бекмұханбетова.

«Жертөледегі су құбырын дұрыстап істеу керек. Сонда су көлемі мен су қысымы сай келетін еді. Бізге тиесілі су құбырын түгелдей, яғни 800 метрі толық айырбастап тасталынған», - деді Оңтүстік-шығыс шағын ауданын сумен жабдықтау цехының басшысы Алмаз Ақпанов.

Жауаптылар халыққа ауыз су қажет мөлшерде беріліп отыр, бірақ тұрғын үйдің жертөлесіндегі құбырлардың шіріп тұрғанын жеткізді. «Қарағанды-Су» жауапкершілігі шектеулі серіктестігінің өкілдері бұл жұмысты қараша халық өз қаражатына ауыстыруы керек деп кесіп айтты. Алайда су жүйелерін толықтай жаңғыртуды қарапайым жұрттың қалтасы көтермейтіні айтпаса да түсінікті. Енді тұрғындарға тамшылап аққан тіршілік нәрін түн жарымға дейін әупірімдеп құтыларына толтырып күй кешуден басқа амал қалмай тұр.

Әйкерім Пернебек, Жанбота Бейсембайұлы, Айнұр Бексұлтанқызы, «Алматы» телеарнасы үшін арнайы Қарағанды облысынан

Оқи отырыңыз: Экологтар дабыл қақты: Атырауда кәріз суы төгілетін аумақ қашан тазартылады