Қосшыда балалар мінген көлік аялдамаға соғылды

 «Лесная поляна» тұрғын алабындағы көшелердің бірінде таңғы сағат 7 шамасында балалар мінген микроавтобус аялдамаға соғылып, бірнеше бала жарақат алды, деп хабарлайды Almaty.tv тілшісі Azattyq Rýhy агенттігіне сілтеме жасап.

Ақмола облыстық полиция департаментінің мәліметінше, оқиға №2 үйдің маңында, жергілікті дүкеннің жанында болған. Алдын ала ақпаратқа сәйкес, Iveco маршрут автобусы мен балабақшаға бара жатқан Toyota маркалы микроавтобус соқтығысқан. Қатты соққыдан кейін Toyota аялдамаға қарай ұшып кетіп, павильонға соғылған.

Микроавтобус салонында 10 бала болған. Жол-көлік оқиғасының салдарынан жетеуі түрлі жарақат алып, Астанадағы медициналық мекемелерге тексеруге жөнелді. Зардап шеккен балалардың жағдайы туралы нақты ақпарат әзірге ресми түрде жарияланған жоқ.

Оқиға орнына келген тергеушілер мен полиция қызметкерлері жол апатының себебі мен мән-жайын анықтап жатыр. Ақмола облыстық полиция департаменті кінәлілердің анықталып, заң алдында жауапқа тартылатынын мәлімдеді.

Оқи отырыңыз: Туристер көп баратын клубта 100-ге жуық адам қаза тапты