Өртенген қоқыс: Байзақ ауданындағы 5 ауылдың тұрғындары түтінге тұншығып отыр

Жамбылда қоқыс полигоны көк түтінге оранып жатыр. Салдарынан Байзақ ауданындағы 5 ауылдың тұрғындары түтінге тұншықтық деп шағымданды, деп хабарлайды Almaty.tv тілшісі.

Аспанын көк түтін торлаған мына полигонға Байзақ ауданының қалдығы шығарылады. Мұндағы 13 гектар аумақтың 1,5 гектары 1 бір аптадан бері жанып жатыр. Ал бықсыған иіс жақын жатқан ауылдарға жетіп, жұрттың мазасын алған.

 «Түнде терезе аша алмаймыз. Кенет ашып қалсақ, үйдің іші түтін болады. Сасық иістен демала алмай қаламыз. Баяғыда демалатын орын едік, қазір қоқыс алаңына айналдық», – деді Қосақ ауылының тұрғыны Тұрымхан Қошқарбаева

Ауыл тұрғындары қоқыс алаңынан жылда жалын шығып, өрт тұтанатынын айтады. Бірақ алқаптың апталап бұлай түтінге оранғанын көрмеген. Ал полигонға жауаптылар өрттің түнде шыққанын айтады. Апат 6 метр тереңдікте болғандықтан, оның алдын алу мүмкін болмаған көрінеді. Қазір өрт сөндірушілер де жалынмен арпалысып жатыр. Өшіре алмаса, ауыр техникамен өртенген тұсты көміп тастауды жоспарлап отыр.

Аудандық әкімдік жұрттың мазасын алған қоқыс алаңын көшіру туралы шешімді былтыр қабылдаған. Алайда кәсіпкер биыл сұрыптау зауытын саламын деген соң шешім қайта қаралған.

 «Егер кәсіпкер қоқыс сұрыптау зауытын салмайтын болса, полигонның жұмысын тоқтатамыз. Қаржы бөлінетін болғандықтан, көшіру жұмысын тоқтаттық», – деді Байзақ аудандық ТҮКШ бөлімінің басшысы Дәуренбек Мәдешов.

Қоқыс полигонының иесіне Төтенше жағдайлар департаменті 800 мың теңге айыппұл салған. Облыстық экология департаменті де жауапкершілік жүктемек. Себебі кәсіпкер экологиялық талапты өрескел бұзып, өрт жайында хабар бермеген.

 «Бізге уақытында хабар бермегені үшін айыппұл саламыз. Сынама алу нәтижесінде көмір тотығы рұқсат етілген шектен 1.2 есе артқаны анықталды», – деді Экология департаментінің бөлім басшысы Ермек Құралбаев.

Айта кетейік, өңірде 163 қоқыс алабы бар. Олардың басым бөлігінде экологиялық талап сақталмаған.

Нұрғиса Қаржаубай, Мейіржан Бейсебай, Тараздан

Оқи отырыңыз: Жезқазған маңынан 350-ге жуық киіктің өлексесі табылды