Ғасырлық мерейтой: Нұрғиса Тілендиевтің туғанына 100 жыл толды

Бүгін Қазақстанның Халық әртісі, күйші-композитор, дирижер Нұрғиса Тілендиевтің туғанына 100 жыл толды, деп хабарлайды Almaty.tv тілшісі.

Қазақтың ұлттық өнері мен мәдениетіне өлшеусіз үлес қосқан дара тұлға Нұрғиса Тілендиевтің туындыларын білмейтін қазақ кемде кем.  Ұлы даланы ән-күйімен тербеген сазгер талай тыңдарманның жүрегінен орын тауып, қазақ киносын да әсем әуенмен әрледі. Қазақ даласын күмбірлі күйімен тербеген дәулескер күйші, сазгер – 400-ге тарта ән мен романстың авторы. 50-ден астам драмалық қойылымға, 19 көркем фильмге, 17 мультипликациялық, 14 деректі  фильмге музыка жазған.

Бүгін күйші-композитордың туғанына тура бір ғасыр толды. Алматыда ұйымдастырылған ауқымды іс-шара Ықылас халық аспаптары музейінде өтті. Ән айтылып, күй орындалды. 

«Ұмытпа» – соңғы жылдары ауырып жатқанда жазылған әні. Сол әнді Бағдат апайдан кейін маған беріп, «Отырар сазы» оркестрінің сүйемелдеуімен орындадым. Көп айтылмай кеткен әндерінің бірі», – деді әнші Бибігүл Қилымхан.

«Шағын сахнада Құрманғазы оркестрі кішігірім құраммен концерт берді десек болады. «Ата толғау», «Аққу», «Атадан мұра» деген шығармалары орндалды», – деді Құрманғазы атындағы Қазақ ұлттық халық аспаптары оркестрінің дирижері Абылай Тілепбергенов.

Іс-шара аясында көрермендерге композитордың мемориалды музей үйінен әкелінген экспонаттар ұсынылды. Онда дара тұлғаның концерттік костюмдері, отбасылық суреттері, ноталары мен жеке заттары қойылған.

«Алматы қаласы музейлер бірлестігі мерейтой аясында бірнеше шара ұйымдастырды. Атап айтсақ, қала әкімдігінің қолдауымен, биыл Нұрғиса Тілендиевтің мемориалды музейінің экспозициясы жаңарады. Сонымен қатар ЮНЕСКО-ның Париж қаласында штаб пәтерінде қазақ халқының ұлттық аспаптарының көрмесін ұйымдастыруды жоспарлап отырмыз», – деді Алматы қаласы музейлер бірлестігінің директоры Ләззат Сағындықова.

Музыкалық туындыларды көрермен ыстық ықыласпен қабылдады. Есті әуенді сағынып келген көпшілік Тілендиевтің әндерін шаттана тыңдап, қосыла шырқады.¤¤

Гүлмарал Изатқызы, Мейрам Исабеков

Оқи отырыңыз: Соғыстан қалған техника: Қалдаяқов көшесінің бойында мұражай ашылады