Денесі жертөледен табылған: министрлік ана өліміне қатысты мәлімдеме жасады

Денсаулық сақтау министрлігінің Медициналық және фармацевтикалық бақылау комитеті Жамбыл облысы Шу аудандық емханасы мен ауданаралық орталық ауруханасында жүкті әйелдің қайтыс болу фактісі бойынша тәуелсіз сарапшыларды тарта отырып, тексеруді бастады, деп хабарлайды Аlmaty.tv тілшісі Baq.kz-ке сілтеме жасап. 

Тексеру кезеңінде Шу ауданаралық орталық ауруханасының бас дәрігері мен перзентхана бөлімшесінің меңгерушісі қызметінен уақытша шеттетілді. Сонымен қатар, Жамбыл облысы Денсаулық сақтау басқармасы басшысының міндетін атқарушы Ержан Мұсабаевқа қатаң сөгіс жарияланып, тәртіптік жауапкершілікке тартылды.

Министрлік медициналық көмек көрсету стандарттарының бұзылуына жол берген өзге де қызметкерлерге қатысты жұмыстан босатуға дейінгі тәртіптік шаралар қолданылатынын хабарлады.

Осы жағдайға байланысты Денсаулық сақтау министрі Жамбыл облысының әкімдігімен өңірдегі босандыру қызметінің сапасын арттыру мәселелерін талқылап, нақты іс-қимыл жоспарын әзірлеуді тапсырды.

Тараз қаласында вице-министр Ержан Нұрлыбаевтың төрағалығымен ана мен бала денсаулығын сақтау жөніндегі үйлестіру кеңесінің көшпелі отырысы өтеді. Жиында медициналық көмектің қолжетімділігі мен сапасын жақсарту бойынша жедел шаралар қабылданбақ.

Бұдан бөлек, министрлік Жамбыл облысындағы барлық босандыру ұйымдарында медициналық көмек көрсету стандарттарының сақталуын тексеруді бастады. Сонымен қатар, Шу көпбейінді орталық ауруханасының перзентхана бөлімшесінің төсектік қоры аудандық орталық аурухана деңгейіне сәйкестендірілмек.

Айта кетейік, бұған дейін Шу қалалық ауруханасында 26 жастағы Әдемі Ешенәлиева босануға барып, сәбиімен бірге жұмбақ жағдайда қайтыс болған еді.

Жүкті келіншектің мәйітін жертөледен тауып алған отбасының айтуынша, 9 наурызда ол ауруханадағы әжетханада есінен танып құлаған. Сол күні таңертең дәрігерлер құрсақтағы баласын алып тастаған, ал өзі комаға түсіп, 22 наурызда қайтыс болған.

Оқи отырыңыз: Алматы облысында өртенген көлік ішінен мәйіт табылды