Төлем тым қымбат: қостанайлықтар мемлекеттің жекеменшік балабақшаларды қолдауын сұрайды

Баласын балабақшаға берген Қостанай қаласының тұрғындары өз ауданындағы жекеменшік ұйымдарға мемлекеттік тапсырыстың берілуін сұрайды, деп хабарлайды Almaty.tv тілшісі.

Қостанайдағы жаңа ықшамауданның тұрғындары екі балабақшаның ашылғанын көп күтті. Ата-аналар жақын арада ел бюджетінен қаражат беріледі деген үмітпен, балаларын ақылы негізде оқуға жіберді. Бірақ мекемеден кемшілік табылғандықтан жекеменшік иесіне конкурсқа қатысуға мүмкіндік берілмей отыр. Ал ата-аналар болса, о баста айтылған жоспардың әлі орындалмай жатқанына наразы.  

«Балабақшаға келерде мемлекеттен қаржы бөлінеді деп үмітпен келдік. Біз  23 мың теңге төлейміз деп ойладық. Бірақ 7 ай өтті, ештеңе өзгермеді», – деді қала тұрғыны Әлия Оспанова. 

«70 мың төлеу өте қиын. Өйткені әкесі бала күтімімен, екі баламен  үйде отырмын. Бір балаға 70 мың теңге балабақшаға, 150 мың тәңге пәтер ақысы,  20 мың теңге коммуналдық шығын, ал азыө-түлікке 50 мың теңге қалады, әрине жетпейді», – деді қала тұрғыны Аида Арпабаева.

Бұрын екі балабақша да мектептердің ішінде орналастырылған. Бірақ орын тапшылығына байланысты екі арадағы келісімшарт үзілген. Кейін балабақша құрылтайшысы басқа нысанды жалға алып, қайта іске кіріскен. Бірақ мемлекеттік тапсырыс әлі берілмеген. Ал қазір қаладағы 1700 бала балабақша кезегін күтіп отыр.

 «Біз төрт рет өтініш жібердік. Бірақ білім бөлімі оның ешқайсысын қабылдамады. Алғашқы екеуінде ескертпелер көрсетілді. Үшінші және төртіншісінде білім беру тапсырысына қатысты ереженің 13-бөлігі, 381-тармағына сай жағдай жасалмағаны жөнінде хабарлама алдық», – деді балабақша меңгерушісі Антонина Ким.

Тағы бір мәрте өтініш қайтарылғандықтан, құрылтайшы соттың көмегіне жүгінген. Нәтижесінде, кемшіліктің нақты неден кеткені анықталған. Екі балабақша да бір үйде және бірінші қабатта орналасқандықтан, екеуінің ас бөлмесі мен бейнебақылау жүйесі жеке-жеке бөлініп, бақылануы керек екен. 

«Комиссия тек заң аясында жұмыс істейді. Егер анықталған олқылықтардың орны толтырылса, «Офстед» жекеменшік мекемесі, басқа мектепке дейінгі білім беру ұйымдары сияқты қайтадан өтініш беріп, конкурсқа қатыса алады», – деді мектепке дейінгі білім беру бөлімінің басшысы Татьяна Жихарева.

Балабақшалардың иесі енді екі мекемнің бірін мемлекеттік тапсырыс конкурсына қатыстырмақ. Себебі мұндағы 6 топтың әзірге біреуі ғана коммерциялық негізде жұмыс істеп тұр.

Рүстем Айткәрім, Елисея Томашевская, Қостанай

Оқи отырыңыз: Журналист болғың келе ме: Алматыда жас тілшілер форумы өтті