Жетісу ауданындағы өрт сөндірілді

Алматының Жетісу ауданында орналасқан алты қабатты ғимаратта шыққан өрт сөндірілді. Новгородская көшесінде орналасқан нысанның шатыры да, сырты да түгел жанып кеткен, деп хабарлайды Almaty.tv тілшісі.

Төтенше жағдай сағат 3:50 шамасында басталған. Өрт сөндірушілер 6 минут ішінде жедел жеткенмен, ол кезде ғимараттың шатырын от шарпып үлгерген. Жалынның күшеюіне ғимараттың ішінде сақталған лак-бояу өнімдері себеп болыпты.

 «Шамамен сағат 3:00-де қарағанда тым-тырыс болған. Біз ар жағында тұрамыз. Ал бір сағаттан кейін жоғары жағы жанып жатқанын көрдік. Кілең бояу, линолеум, жиһаздар өртенді, кәсіпкерлерге обал болды», – деді қала тұрғыны Гүлфара Жүсіпова.

 «Кеше ғана дүкенге келгенбіз. Жеміс-жидек сатып алдық. Бұндай өртке оранып, жанып кетеді деп ойламадық. Өкінішті, ауданымыздағы өте жақсы ғимарат еді», – деді қала тұрғыны.

Жетісу ауданында болған ірі өрт 5400 шаршы метр аумақты шарпыды. Тілсіз жаумен күреске 85 құтқарушы мен 29 арнайы техника жұмылдырылды. Өртті ауыздықтауға мемлекеттік құрылымдармен қатар, бейтарап ұйымдар да атсалысты. «Алматы су» мекемесі үздіксіз су жеткізіп, өрт сөндіру жұмыстарының тоқтаусыз жүруіне жағдай жасады.

 «Жұмылдырылған күштердің арқасында сағат 6:38-де өрт толық сөндірілді. Қазіргі таңда ғимаратқа су құю және үйінділерді қопару жұмыстары жүргіліп жатыр. Абырой болғанда өртте қаза тапқан, зардап шеккен адамдар жоқ. Жертөледегі тауарлар, заттар, мүліктер толық құтқарылды», – деді ТЖД Жетісу ауданы Төтенше жағдайлар басқармасының бастығы Еркебұлан Қасенов

Қызыл жалын шарпыған жердің ауқымы көлемді болғанымен, адам шығыны тіркелген жоқ. Қазір мамандар өрттің нақты себептерін анықтап жатыр. Ал әкімшілік ғимараттың қаншалықты зақымданғаны алдағы сараптама барысында белгілі болады.

Мәди Мәлік, Жақсылық Тілепберген

Оқи отырыңыз: Түркістан облысында насыбай шығаратын жасырын цех жойылды