Мьянмадағы жер сілкінісінен қаза тапқандар саны 2800-ден асты

Мьянмада қаза тапқандар саны 2886-ға жетті, сондай-ақ 4639 адам жарақат алған, деп хабарлайды Аlmaty.tv.

Синьхуа агенттігінің хабарлауынша, із-түзсіз жоғалып кеткен 373 адам жер сілкінісінен бес күн өтсе де әлі табылған жоқ.

Бұл туралы сәрсенбі күні Мьянма мемлекеттік әкімшілік кеңесінің ақпараттық тобы мәлім еткен.

Мьянма Қызыл Крест қоғамының президенті Мио Нюнт бұған дейін жалғасып жатқан құтқару операцияларындағы негізгі қиындықтар жер сілкінісінің салдарын бағалау және логистиканы үйлестіруден туындап отырғанын айтқан.

Оның айтуынша, зардап шеккен аймақтардағы қауіпсіздік мәселелеріне байланысты құтқарушылар жүктерді таратуда айтарлықтай қиындыққа тап болған, әсіресе ауыр техниканың тапшылығы байқалады.

Еске салайық, 28 наурызда Мьянмада 7,7 балдық жер сілкінісі болды. Зілзала сондай-ақ көршілес бес елде, соның ішінде Таиландта да сезілген. Бангкоктағы күшті жер сілкінісі салдарынан салынып жатқан көпқабатты үй қирап қалған.

Оқи отырыңыз: «Бэтменді» сомдаған актер Вэл Килмер дүниеден озды