AMANAT партиясының депутаттары ХҚКО-ның қызметкерлеріне референдум туралы айтты

Алматы қаласы Алатау ауданының Халыққа қызмет көрсету орталығының қызметкерлері алдағы референдум туралы ақпараттандырылды. Оларға республикалық және қалалық штабтың мүшелері - AMANAT партиясының депутаттары Жұлдыз Сүлейменова, Қали Сәрсенбай, Әсия Ақанова және партияның Алматы штабының басшысы Мейіржан Отыншиев еліміздің Ата заңына енгізілетін түзетулер туралы айтып берді, деп хабарлайды Almaty.tv.

«Бүгін біз Алатау ауданының Халыққа қызмет көрсету орталығында орталықтың өзіне келген қызметкерлер мен азаматтар үшін референдум және конституциялық реформалар бойынша түсіндіру жұмыстарын жүргіздік. Негізгі мақсаттардың бірі - конституциялық реформалар біздің мемлекетіміздің болашағы үшін және әрбір азамат үшін маңызды процесс екенін түсіндіру, оның мазмұнын алдағы өзгерістер мен баптар туралы түсіндіру болды. Алматылықтар тарапынан көптеген сұрақтар болды. Бұл әлеуметтік мәселелер, инклюзивті білім беру мәселелері, сондай-ақ көрнекі мазмұнның санын арттыру бойынша ұсыныстар, өйткені мәтіндік форматта үлкен материалды қабылдауда қиындықтар бар. Біз өз құзыретіміз аясында түсіндіру жұмыстарын жүргіздік. Барлық мәселелер менің жеке бақылауымда болады", - деді партияның Мәжілістегі депутаттық фракциясының мүшесі Ж.Сүлейменова.

Партиялықтар ең маңызды мәселе суперпрезиденттік басқарудан президенттік басқаруға көшу екенін атап өтті.

«Алдағы референдум - мемлекетіміздің болашағын айқындайтын тарихи процесс. Конституцияға ұсынылып отырған түзетулердің ел үшін маңызы зор, олар қазір белсенді трансформация кезеңіне өтіп жатқан қоғамға бағдарланған. Осы ортақ істе біз қазақстандықтар ретінде өзіміздің азаматтық ұстанымымызды көрсетуіміз керек», - деп атап өтті Алматы қаласы мәслихатының депутаты Қали Сәрсенбай.

Сондай-ақ азаматтар аманаттықтарға мүгедектігі бар адамдардың өмір сүру сапасын арттыру, сондай-ақ педагогтарға арнайы медициналық қызметтер көрсету және сақтандыру мәселелері бойынша сұрақтар қойды.

Күн сайын халықпен өзара іс-қимыл жасайтын ХҚКО қызметкерлері осы жылғы 5 маусымға жоспарланған референдумның мақсаты мен мәнін түсіндіргені үшін алғысын білдіріп, кездесу барысында алынған ақпарат оларға мемлекеттік қызметтерді алу барысында келушілердің референдум бойынша қоятын сұрақтарына дұрыс жауап беруге көмектесетінін жеткізді.