Қазақстанда жеке куәлік пен төлқұжатты 1 күнде алуға болады

Қазақстанда жеке куәлік пен төлқұжатты беруді  жеделдетудің жаңа қызметі іске қосылмақ, деп хабарлайды ҚазАқпарат.

Енді құжаттарды Астана, Алматы, Ақтөбе және Шымкентте бір күнде қолға алуға болады. Осы орайда, тиісті ережеге өзгертулер 2018 жылғы 23 шілдедегі Үкіметтің қаулысында қарастырылған.

Атап айтқанда, Қазақстан Республикасы азаматының төлқұжаты, Қазақстан республикасы азаматының жеке куәлігі Астана, Алматы, Ақтөбе, Шымкент қалаларында рәсімделген күннен бастап бір жұмыс күніне дейін жеделдетілген тәртіпте беріледі.

Ал облыс орталықтарында үш жұмыс күнге дейін, сондай-ақ аудандарда, облыс қалаларында жеті жұмыс күніне дейін тапсырылады. Мемлекеттік бажды есептемегенде, құжаттарды жедел даярлау қызметінің құны аталған төрт қала үшін 4 983 теңгені құрайды.

Аталған Қаулы ресми жарияланған күннен кейін күнтізбелік 10 күн өткеннен соң қолданысқа енеді.