Алматыда Атмосфералық ауаны қорғаудың жаңа ережелері әзірленді

Үкіметте Премьер-министр Олжас Бектеновтің төрағалығымен "Жасыл экономикаға" көшу жөніндегі кеңестің отырысы өтті. Кеңесте Президенттің экологиялық тепе-теңдікті сақтау және еліміздің тұрақты экономикалық прогресін қамтамасыз ету жөніндегі тапсырмаларының орындалу барысы қаралды. Алматы қаласы, Шығыс Қазақстан және Қарағанды облыстары әкімдерінің "жасыл экономика" индикаторларына қол жеткізу жөніндегі іс-шаралар жоспарын іске асыру туралы баяндамалары тыңдалды, деп хабарлайды Almaty.tv Үкімет басшысының баспасөз қызметіне сілтеме жасап.

Негізгі экологиялық сын-қатерлер, атап айтқанда ауаның ластануы, қалдықтарды басқару және қоршаған ортаға теріс әсерді азайту және басқа да шаралар қаралды. Экология және табиғи ресурстар министрлігінің деректері бойынша еліміздің 15 қаласында ауаның ластану деңгейі жоғары, оның ішінде Алматы және Қарағанды қалаларында бұл көрсеткіш "өте жоғары" деңгейде.

Алматының экологиялық бағдарламасы 

Алматы әкімі Ерболат Досаев Премьер-министрге "жасыл экономикаға" көшу жөніндегі іс-шаралар жоспарын іске асыру барысы туралы баяндады. Қазіргі таңда ауаның ластануын азайту, орман қорын дамыту, су ресурстарын тиімді пайдалану мен қалдықтарды басқару, ESG-қағидаттарын енгізу және "жасыл" облигациялар шығару бойынша жұмыстар басым бағыттар ретінде айқындалған.

Мамандардың есептеуі бойынша, Алматы агломерациясында ауаға шығарылатын зиянды заттардың жалпы көлемі 225,2 мың тоннаға жетеді, оның шамамен 84%-ы мегаполистің өзіне тиесілі. Қалада зиянды қалдықтардың ең көп үлесін, яғни, 60%-ын автокөліктер, ал 27%-ын өнеркәсіп кәсіпорындары шығарады. Әкім Алматыда Атмосфералық ауаны қорғаудың жаңа ережелері әзірленгенін, ол 2025 жылдың бірінші тоқсанында Мәслихаттың қарауына ұсынылатынын атап өтті. Олар жылжымалы және стационарлық көздерді қатаң реттеуге мүмкіндік береді.

"Сонымен қатар ЖЭО жаңғырту жұмыстары жалғасуда. Нәтижесінде, ауаға тарайтын зиянды заттар көлемі 93%-ға, яғни 37,3 мың тоннадан 2,7 мың тоннаға дейін төмендейді. 2026 жылы жылу көзі көмірден газға ауысады деп күтілуде. Сондай-ақ жеке тұрғын үй секторын газбен қамтуға ерекше назар аударылуда, бүгінгі таңда үйлердің 99,4%-на тиісті инфрақұрылым тартылды. 

Алматы қаласының ауасына автокөліктің теріс әсерін азайту мақсатында 2024 жылдан бастап дизель отынымен жұмыс істейтін қоғамдық көлікті сатып алуға тыйым салынды. 2024 жылдың қорытындысы бойынша троллейбус паркі 100%-ға жаңартылды, автобус паркін жаңғырту 2025 жылы одан әрі жалғасады. Бұл ретте, 2024 жылғы 1 желтоқсандағы жағдай бойынша еліміздегі электромобилдердің 58%-ы немесе 7 875 бірлікті құрайтын ең көп саны Алматыда тіркелген", - делінген хабарламада. 

Сондай-ақ Ерболат Досаев Мемлекет басшысының "Алматы – бақ-қала" мәртебесін жандандыру жөніндегі тапсырмасын орындау аясында жүргізіліп жатқан жұмыстар туралы баяндады. 2030 жылға дейін 2,5 млн жасыл желек отырғызу жөніндегі жол картасына сәйкес, 2023-2024 жылдар кезеңінде мегаполисте 643 мың ағаш көшеті отырғызылды. Сонымен қатар Жасыл желектерді қорғау мен күтіп-ұстаудың жаңа ережелеріне сәйкес, суару жүйесін міндетті түрде жүргізу нормасы енгізілді. Осының нәтижесінде 2 жыл ішінде 500 км автосуару және тамшылатып суару желілері орнатылды.

Сапалы сумен жабдықтауды қамтамасыз ету үшін 2024 жылы жалпы қуаты тәулігіне 54,3 мың м3 болатын жаңа су көздері пайдалануға берілді. Сондай-ақ 2025 жылы толығымен аяқтау жоспарланып отырған тұрмыстық қатты қалдықтарды жинау инфрақұрылымын жаңғырту барысы туралы да баяндалды. Алматы әкімі Ерболат Досаев қытайлық Shanghai SUS Environment Co. Ltd компаниясымен бірлесіп қуаты тәулігіне 2 мың тоннаға дейін қалдықтарды энергетикалық кәдеге жарату зауытын салу жоспарланып отырғанын атап өтті.

Премьер-министр Олжас Бектенов сарапшылар қауымдастығы тарапынан айтылған ұсыныстарды пысықтап, «жасыл экономикаға» көшу бойынша бірлескен жұмысты күшейтуді тапсырды. Халықтың өмір сүру сапасын жақсарту үшін экологиялық мәселелерді шешудің маңыздылығы атап өтілді. 

"Мемлекет басшысы алдымызға “жасыл экономикаға” көшу міндетін қойды. Бұл – тек экологиялық тұрақтылық мәселесі емес, сонымен бірге, ұзақмерзімді экономикалық даму мәселесі. Біз ел тұрғындарына өндірістік факторларының кері әсерін азайту арқылы инновациялық технологияларды енгізуге, саланың серпінді өсуіне жағдай жасауымыз керек", — деп атап өтті Олжас Бектенов. 

Премьер-министр әкімдіктерге мүдделі орталық мемлекеттік органдармен бірлесіп, "жасыл экономика" индикаторларына қол жеткізу жөніндегі іс-шаралар жоспарының сапалы әрі уақтылы орындалуын қамтамасыз етуді тапсырды.

Отырыс барысында атом және сутегі энергетикасын дамыту перспективалары да қарастырылды.

Оқи отырыңыз: Үш мың полицей күзетеді: Алматыда қай жерлер ерекше бақылауға алынады