Алматы әкімі актер және режиссер Олег Лиге ІІ дәрежелі «Барыс» орденін тапсырды

Мемлекет басшысы Қасым-Жомарт Тоқаевтың Жарлығына сәйкес театр өнерін дамытуға қосқан зор үлесі үшін актер әрі режиссер Олег Ли II дәрежелі «Барыс» орденімен марапатталды, деп хабарлайды Almaty.tv.

Президенттің тапсырмасы бойынша жоғары мемлекеттік марапатты Алматы қаласының әкімі Ерболат Досаев тапсырды.

Қала басшысы Олег Лиді 80 жылдық мерейтойымен құттықтап, мерейтой иесінің бүкіл өмірін театр өнері саласына арнаған жетістіктерін атап өтті.

«Осындай жоғары мемлекеттік наградамен Президент сіздің елеулі және ерекше үлесіңізді атап өтті. Сіз – театр өнерінің ең көрнекті өкілдерінің бірісіз. Корей театрын сіздің рөлдеріңізсіз, қойылымдарыңызсыз елестете алмаймын. Сіздің ерекше дарыныңыз бен таңдаған ісіңізге риясыз қызмет етуіңіз Қазақстанның театр өнерінің үздік дәстүрлерін арттыруға зор үлес қосты. Біз сіздің қойылымдарыңыз бен фильмдеріңізбен өстік. Сізге зор денсаулық және жаңа шығармашылық жетістіктер тілеймін», – деді Ерболат Досаев.

Олег Ли өзінің мансабында 40-тан астам фильм мен телехикаяда ойнады, сонымен қатар көрерменнің сүйіспеншілігіне бөленіп, театр сахнасында жарқын, есте қалатын кейіпкерлердің бірегей бейнесін жасады.

«Мемлекеттік республикалық академиялық корей театры ұжымы мен басшылығының атынан осы жоғары дәрежелі орден иесі атануды зор ризашылықпен қабылдаймын. 1937 жылы күштеп көшірілген адамдарды ашық рухпен қабылдап, соңғы бір үзім нанымен бөліскен қазақ халқына айтар алғысымыз шексіз. Қазақ топырағында біз халықаралық деңгейде нақтыланған Қазақстанның көпұлтты отбасына айналдық», – деді Олег Ли.

Олег Лидің көркемдік жетекшілігіндегі республикалық мемлекеттік академиялық корей музыкалық комедия театры корей диаспорасы өмірінің маңызды бөлігіне ғана емес, сонымен қатар корей өнері мен мәдениетіне қызығушылық танытқан қазақстандықтар үшін сүйікті өнер ордасына айналды.

Кездесу соңында Алматы қаласының әкімі Ерболат Досаев актерге жылы лебізін білдіріп, республикалық мемлекеттік академиялық корей музыкалық комедия театрына баруға уәде берді.

«Олег Сафроновичтың театрға қосқан үлесі көп. Оның көмегімен репертуарымыз классикалық туындылармен толықты. Әртістер нағыз классикалық актерге тән қырымен танылды. Ол – театрдың бетке ұстар әртісі. Оның режиссерлік дарыны да бөлек», – деді ҚР Корей музыкалық комедия театрының көркемдік жетекшісі Любовь Ни.

Олег Ли 1942 жылы 4 мамырда Өзбек КСР Наманган қаласында туылған.

1961 жылы Ташкент электромеханикалық техникумын, 1969 жылы Ташкент энергетикалық байланыс институтын бітірген.

1975 жылы Құрманғазы атындағы Қазақ мемлекеттік консерваториясының актерлік факультетін, 1983 жылы Алматы мемлекеттік театр-көркемсурет институтының режиссерлік факультетін бітірген

1975 жылдан – мемлекеттік корей музыкалық комедия театрының актері және режиссері. 1996 жылдан – Қазақстан республикалық корей музыкалық комедия театрының бас режиссері (Алматы қаласы)